Vise Primeiru-Ministru Enkontru ho Ekipa WFP Ko’alia Assuntu Seguransa Alimentár no Programa Merenda Eskolér
Dili, 09/08/2023: Vice-Primeiro Ministro, Ministro Coordenador dos Assuntos Social e Ministro de Desenvolvimento Rural e Habitação Comunitária, Eng. Mariano Assanami Sabino, enkontru ho ekipa World Food Programme (WFP), iha Palasiu Governu.
Ekipa WFP ne’ebé lidera husi Sra. Alba Cecilia Garzon Olivares, hato’o sira nia kongratulasaun ba Eng. Mariano Assanami Sabino, ne’ebé simu responsabilidade foun iha IX Governu.
Enkuantu, WFP mós rona parte governu kona-ba knaar saida mak bele apoiu liu-liu iha Objetivu Dezenvolvimentu Sustentavel (ODS), ne’ebé foku ba Seguransa Alimentár no Programa Mereneda Eskolár iha futuru.
Parte WFP mós hatudu nafatin sira nia komitmentu hodi apoiu governu ho kapasidade tekniku nian iha área nútrisaun no assuntu seluk ne’ebé governu nesesita.
Alende ne’e, Vise Primeiru-Ministru, lori IX Governu nia naran agradese ba WFP ne’ebé tinan 20-resin ona hala’o sira nia misaun hodi ajuda Timor-Leste nia dezenvolvimentu iha área oi-oin, espesial iha seguransa alimentár no nútrisaun nian.
Iha enkontru ne’e parte rua diskute atu servisu hamutuk halo investimentu hodi dezenvolve labarik sira nia nútrisaun hahú bebé sei iha inan nia kanotak.
“Hahú ba oin ita sei halo servisu integradu ho parte Ministériu Edukasaun, Saúde, halo kampaña atu inan sira iha koñesementu ba ai-han nútritivu sira hodi fó han labarik sira,” dehan Vise Primeiru-Ministru.
Investimentu ne’ebé governu no parseiru dezenvolvimentu sira halo ona presiza avalia, atu nune’e orsamentu ne’ebé kada tinan aprova ita bele hatene redusaun núemeru kazu má-nútrisaun no hamlaha nian, no bele hatene mudansa rendimentu ekonomia husi eskala kiik, mediu no ba eskala boot ne’e iha ka la’e.
Ba kestaun ida ne’e mak hanoin katak presiza halo ona investimentu ne’ebé integradu husi ministériu relevante sira ba oin.
Media V-PM, MCAS-MDRHC
