Vise-Primeiru Ministru Enkoraza Grupu Produtor Servisu Makas Garantia Soberania Alimentar

Dili,26/08/2024: Vice-Primeiro Ministro, Ministro Coodernador dos Assuntos Sociais, Ministro do Desenvolvimento Rural e Habitação Comunitária, Eng. Mariano ASSANAMI Sabino, partisipa Feira Nasional Produtu Lokal, ne’ebé organiza husi Ministeriu Agrikultura Peskas Pekuaria no Floresta (MAPPF), hodi komemora loron konsulta popular 30 Agusto.

Komemorasaun ne’e ho tema “Hamutuk ho Povu Agrikultores iha Kompromisu hodi Hasa’e Produsaun Agrikula, Peskas, Pekuaria no Florestal atu Asegura Seguransa Aihan iha Timor-Leste”

Iha abertura feira refere, mak Vise-Primeiru Ministru, enkoraza grupu produtor agrikula hanesan, hakiak nain, to’os no natar nain sira atu kontinua servisu makas hodi bele asegura soberania aihan iha ida-idak nia Aldeia, Suku to’o nasional.

“Ohin ha’u sai hanesan Ministru Dezenvolvimentu Rural, ita sei servisu hamutuk iha area rural, halo produsaun barak liutan hamutuk ho Ministeriu Agrikultura no Ministeriu sira seluk ne’ebe sei ba area rural,” dehan V-PM.

Governu ida ne’e iha kompromisu boot hakarak dezenvolve setor agrikultura tanba ne’e Agrikultor sira presiza servisu hamutuk ho Ministeriu Agrikultura atu halo produsaun barak liutan.

Tanba ne’e, husu ba Ministru Agrikultura atu nakloke ba povu agrikultor sira ne’ebe mai ho kabala lipa, kalsa badak, hatais sinelus fó tempu ba sira ko’alia simu sira nia kritika, sujestaun atu ita bele hamutuk dezenvolve setor agrikultura ba oin ho sustentavel.

Vise-Primeiru Ministru mos apresia no agradese ba agrikultor, tratorista, extensionista, guarda floresta, peskadores hotu-hotu ne’ebe durante ne’e dedika an tomak la sente kolen hodi servi rai no povu ida ne’e oinsa garantia seberania aihan.

Partisipa iha feira ne’e mai husi grupu produtor oi-oin ne’ebe mai husi munisipiu no inklui mos diresaun sira ne’ebe ejiste iha MAPPF.