𝐌𝐢𝐧𝐢𝐬𝐭𝐫𝐮 𝐃𝐞𝐳𝐞𝐧𝐯𝐨𝐥𝐯𝐢𝐦𝐞𝐧𝐭𝐮 𝐑𝐮𝐫𝐚𝐥 𝐧𝐨 𝐇𝐚𝐛𝐢𝐭𝐚𝐬𝐚𝐮𝐧 𝐊𝐨𝐦𝐢𝐧𝐢𝐭𝐚𝐫𝐢𝐚 𝐋𝐚𝐧𝐬𝐚 𝐅𝐨𝐫𝐦𝐚𝐬𝐚𝐮𝐧 𝐋𝐨𝐤𝐚𝐥 𝐒𝐚𝐞𝐦𝐚𝐮𝐥 𝐔𝐧𝐝𝐨𝐧𝐠

𝐃𝐢𝐥𝐢,𝟐𝟑/𝟏𝟏/𝟐𝟎𝟐𝟑: Vice-Primeiro Ministro, Ministro Coordenadór dos Assuntos Sociais, Ministro do Desenvolvimento Rural e Habitação Comunitária Eng. Mariano ASSANAMI Sabino, lansa formasaun lokal Saemaul Undong 2023, iha Resintu Timor Lodge.

Iha intervensaun Vise-Primeiru Ministru, agradese ba ekipa tomak neebé organiza hodi ezekuta programa refere no agradese ba Vise-Prezidente Saemaul Undong neebé mai hamutuk iha nee.

Formasaun loron tolu nee imporante tebes atu formandu sira bele koñese diak liután movimentu ida nee, oinsá ninia lalaok no pratika, presiza halo avaliasaun fila fali ba fatin neebé realiza ona programa sira.

“Husu kontinua identifika difikuldade sira iha terenu no halo reflesaun ba pontus materia sira neebé hetan bazeia ba esperensia neebé ita iha, fiar katak iha futuru sei bele hetan rezultadu neebé diak hodi hadia ita nia pratika, hadia ita nia servisu iha kraik,” dehan, Vise-Primeiru Ministru.

Movimentu ida nee importantes tebes, Timor-oan agora servisu volontarizmu menus tebes ona, barak agora hanoin deit osan oinsá hetan ajuda husi governu, ajensia sira, la fiar aan ona oinsá atu hambrik rasik iha nia ain leten.

Hakaraka atu halo mudansa ba rai ida nee, presiza koloka aan nudar pioneiru ka ema importante ida halo mundansa iha aldeia ka suku neebé hela ba, labele hanoin katak sai membru governu ka Parlamentu Nasionál foin bele kontribui.

Ida-idak tenke fiar aan hambrik rasik iha nia ain leten, hahú ho movimentu kiik ida iha aldeia no suku neebé hela ba, hatene rezolve nia problema rasik, tulun rasik nia an, depois tulun fali ema seluk.

Liu husi formasaun nee atu haree prinsipiu,valores, mekanizmu no metodu oinsá Corea do Sul hahú ho situasaun defisil, sira uluk defisil liu Timor tanba sira la iha rekursu naturais, maibé ohin loron sira avansadu tebes.

Tanba nee, liu husi formasaun nee presiza aprende, servisu ekipa, ho disiplina, dedikasaun tomak hodi halo mundansa ba aldeia no suku neebé hela ba, imi tenke sai lilin ida neebé lakan no halakan tan lilin seluk iha fatin neebé seidauk iha.

𝐌𝐞𝐝𝐢𝐚 𝐕𝐏𝐌-𝐌𝐂𝐀𝐒-𝐌𝐃𝐑𝐇𝐂