Dili, 18/07/2023: Vice-Primeiro Ministro, Ministro Coordenador dos Assuntos Sociais e Ministro do Desenvolvimento Rural e Habitacao Comunitaria, Eng. Mariano Assanami Sabino, reprejenta IX Governu Konstitusionál hodi parabeniza Centro Nacional Chega (CNC), ne’ebé komemora nia aniversáriu ba dala VI ho tema, Rekupera, Reafirma no Reforsa.
Vise-Primeiru Ministru, Eng. Mariano Assanami Sabino, konsidera, Chega nudar instituisaun ne’ebé importante ba estadu, hodi prezerva memoria luta pasadu nian ba jerasaun foun sira aprende, hodi sai as’wain foun iha era ne’e.
Iha luta pasadu ema barak sente sai vitima, hetan torturasaun ho sofrimentu oi-oin, no Timor oan sira mate liu rihun 300, situasaun ne’e sente todan, maibé rezulta independensia ida, ohin loron povu goza ona ninia liberdade.
“Ha’u hambrik iha palku oi-oin sempre fó mensajen ba joven sira ne’ebé inklina aan iha organizasaun oi-oin, atu kontinua respeitu malu, hamutuk hari paz no rekosiliasaun hodi valoriza luta eroi 300 mil pesoas ne’ebé mate ba rai ida ne’e,” dehan Vise-Primeiru Ministru, iha ambitu komemorasaun aniversariu CNC ba dala neen, iha Eis Komarka, Balide.
Situasaun pasadu ne’e fó mensajen ba joven hotu-hotu atu banati tuir joven sira seluk ne’ebé uluk luta ba independensia, entaun joven agora tenke hambrik foti responsabilidade sai eroi foun ba dezenvolvimentu nasionál, labele sai fali obstakulu hodi impende ema seluk nia liberdade.
Tanba ne’e, lori governu nia naran sei kontinua apoiu ejistensia CNC nian ba futuru, no sei ko’alia ho Ministériu Edukasaun oinsá atu inklina materia historia pasadu nian iha kuriku eskolár, atu nune’e foinsa’e sira estuda hodi hametin sira nia nasionalizmu no patriotizmu sai vanguarda ba RDTL ohin no ba futuru.
Iha serimonia aniversariu CNC ne’e hetan partisipasaun masimu husi, sobrevivente sira, sivíl no militares, diplomariku sira no selu-seluk tan.
Media
