Dili, 18/08/2023: Vice-Primeiro Ministro, Ministro Coordenadór dos Assuntos Sociais e Ministro Desenvolvimento Rural e Habitação Comunitária Eng. Mariano Assanami Sabino, reprejenta Sua Exelensia Primeiru Ministru, Kay Rala Xanana Gusmão no nudar mós eis Prezidente Ferderasaun Motociclismo hodi partisipa eventu refere iha, Tasi-tolu.
Eventu ne’e ho tema, Pertamina Internasionál Road Race hodi komemora loron aniversáriu Falintil ba dala 48.
Partisipa eventu ne’e, mai husi klubu motociclismo nasionál no internasionál, ho klase oi-oin.
Iha diskursu Vise-Primeiru Ministru, Eng. Mariano Assanami Sabino, lori IX Governu Konstitusionál nia naran hakarak apresia ba Federasaun Motociclismo ne’ebé servisu hamutuk ho nia patrosinadór tomak kria eventu hodi selebra loron importante ne’e.
“Lori governu nia naran apresiza ba eventu ida ne’e no ba oin sei apoiu eventu desportivas oi-oin, hanesan motor kros, biskaleta karreta, no sira seluk,” dehan Vise-Primeiru Ministru.
Eventu desportivas modelu hanesan ne’e importante tebes presiza apoiu, ba joven partisipante sira presiza kontinua espiritu as’wain sira nian hodi dinamiza luta iha eventu foun sira hanesan ne’e, hodi hatudu nafatin Timor-Leste ninia integridade liu husi kompetisaun oi-oin.
Joven sira nia luta diferente ho Falintil sira, maibé luta nafatin luta, juventude sira tenke luta kontinua iha aspeitu hotu-hotu hodi tane as liberdade ne’ebé as’wain sira sosa ho 300 mill pesoas mate ba rai ida ne’e.
As’wain sira mate hodi sosa liberdade, tanba ne’e joven heroiku sira hotu-hotu tenke garantia ema hotu nia liberdade atu partisipa iha eventu saida de’it ho hakmatek.
Governu konstitusionál sei apoiu jerasaun foun sira ba desportu hotu-hotu, tanba ne’e sei ko’alia ho Ministru Juventude Desportu atu buka hakas an hodi dudu desportu ba oin.
Moris di’ak la’os tanba osan barak ne’e, maibé sidadaun sira nia liberdade, kontente, haksolok hodi partisipa iha eventu saida de’it ne’e mós hola parte ona ba moris di’ak.
Lori Primeiru Ministru, Maun Boot, Kay Rala Xanana Gusmão nia naran hakuak boot ba pembalap Timor oan sira, no husi Indonezia ne’ebé harame ona eventu ida ne’e.
Media V-PM-MCAS-MDRHC
