𝐒𝐚𝐞𝐦𝐚𝐮𝐥 𝐔𝐧𝐝𝐨𝐧𝐠 𝐒𝐚𝐢 𝐑𝐞𝐟𝐞𝐫𝐞𝐧𝐬𝐢𝐚 𝐛𝐚 𝐃𝐞𝐳𝐞𝐧𝐯𝐨𝐥𝐯𝐢𝐦𝐞𝐧𝐭𝐮 𝐑𝐮𝐫𝐚𝐥 𝐢𝐡𝐚 𝐓𝐢𝐦𝐨𝐫-𝐋𝐞𝐬𝐭𝐞

𝐊𝐨𝐫𝐞𝐚, 𝟎𝟐/𝟏𝟏/𝟐𝟎𝟐𝟑: Vise Primeiru Ministru e Ministru Dezenvolvimentu Rural no Abitasaun Komunitária (MDHC), Eng. Mariano ASSANAMI Sabino, hakarak lori programa Saemaul Undong sai referensia hodi dezenvolve aldeia no suku neebé identifikadu iha Timor-Leste.

Ministru MDHC Eng. Mariano ASSANAMI Sabino, liu husi diskursu iha ”Forum Global Saemaul Leadership 2023” lori Governu Timor-Leste nia naran hatoo agradesimentu ba Sentru Saemaul Undong Korea do Sul neebé konvida hodi partisipa konferensia refere.

Liu husi forum ida nee Sua Exelénsia hatoo katak, Governu Timor-Leste durante nee halao ona servisu parseria neebé kritiku no forti tebes hodi hakbesik an dezenvolvimentu ba komunidade sira hodi bele ajuda eleva padraun moris no hadia dezenvolvimenu ekonomiku iha Timor-Leste ho sustentavel.

Saemaul Undong maka sai baze fundamental hodi hadia nasaun Korea do Sul no halo mudansa boot husi nasaun aid donor ba aid giver hatudu nia istoria no kapasidade rasik, esforsu hirak neebé uza aproximasaun ba intervensaun hodi mellora kresimentu ba padraun moris nian entre área urbana no rurais neebé kontinua iha pobreza nia laran liuhusi transformasaun mental.

Movimentu ida nee bele hafanu fila fali Timor-oan sira nia espiritu badinas atu hakbit nia an, ajuda ema seluk no kooperasaun hodi enkoraza komunidade hotu bele inklina an iha prosesu dezenvolvimentu neebé sai hanesan modelu signifikativu ba komunidade mundial.

Governu Timor-Leste luta hodi kombante kiak tanba ida nee nudar dever servisu ida neebé kulminante mai Timor liuhusi politika IX Governu nian neebé trasa ona no kompromete an atu bele haforsa parseria entre governu no parseiru dezenvolvimentu sira hotu hodi bele melloria servisu no hadia povu nia moris neebé sei moris iha liña pobreza nunee hotu-hotu presiza servisu hamutuk atu hadia povu nia moris ba moris diak.

Modelu neebe aplika iha Tmor-Leste inspira husi dezenvolvimentu komunitariu Saemaul Undong neebe implementa iha Munisipiu Lautem neebe sai giaun no lokaliza tuir medelu Dezenvolvimentu Rural iha Timor-Leste.

Governu Timor-Leste kompromete hodi aplika tuir mós espiritu hanesan Saemaul Undong nuudar inisiativa foun ba Movimentu Revitalizasaun Komunidade. Objetivu imprtante maka aumenta komunidade sira nia koñesimentu no aplika tuir pratika kultural sosiu no ekonomiku rai laran.

Ministériu ida nee nia prezensa atu hadia lakuna sira neebé Timor hasoru hodi kompleta modelu dezenvolvimentu rural ida neebe fasilmente bele direitamente fó benefisiu ba povu iha área rurais. SMU nuudar faze importante husi lisaun neebé komunidade sira aprende nudar paradigma foun no vizivelmente kria mundu neebé diak liután.

“Ita hotu hatene katak MDRHC maka ministeriu foun entre ministeriu seluk iha politika IX Governu Konstitusionál. Ami nia kompromisiu boot maka sei habot programa ida nee iha nivel aldeia sira neebé sei implementa iha 2024. Komponente baze neebé esensial ba planu estrateziku dezenvolvimentu rural maka sei implementa iha aldeia sira neebe selesionadu no elijivel,” dehan, Ministru MDRHC, iha Korea do Sul.

Vise-Primeiru Ministru Informa, prosesu sira nee sei implementa fazeadamente bazeia ba programa Saemaul Undong ho nia inisiativa sira neebé iha potensialidade atu halo promosaun tuir kreatividade, no inovasaun nudar prioridade prinsipal husi lideransa komunitária, lokal no sentral inklui parseirus dezenvolviventu sira.

Programa ida nee sei halo harmonizasaun ba dezenvolvimentu komunitária sira neebe ezekuta iha nivel komunitaria no fó atensaun ba vizaun neebé sei konkretiza hanesan iha rai laran no servisu hamutuk ho nasaun sira iha rai liur.

Ministériu ida nee iha responsabilidade neebé signifikativu tebes hodi koordena no implementa politika, leis, padraun sira ho vizaun ida neebé diak no prosperu hodi harii futuru neebé naroman liután ba oin.

Iha diskursu Vise-Primeiru Ministru rekomenda ba Sentru Seamaul Undong atu fornese fasilidades adekuadu no ajuda fó formasaun no kapasitasaun ba lideransa aldeia sira neebe sei koloka iha nivel aldeia sira. Iha Forum Saemaul Undong Global ida nee mós rekomenda ba Prezidente Saemaul Undong atu konvida reprezentante husi Akademia, Emprejariu, Sosiedade Sivil atu partisipa iha konferensia seluk neebe sei realiza iha periodu tuir mai, atu bele hasae koñesementu kona-ba importansia programa Saeamaul Undong ba komunidade.

Iha ambitu nee ida nee Timor presiza haforsa kooperasaun no parseria nudar komponente importante maka 2024, MDRHC sei asina akordu parseria atu bele hametin relasaun entre nasaun rua hodi harii kompromisu kolletivu atu hamenus kiak iha nasaun foun Timor-Leste.

Nasaun foun presiza paradigma foun ho hanoin foun hodi hametin soberania aldeia nudar aliserse ba dezenvolvimentu sustentavel liuhusi Programa Dezenvolvimentu Rural no Abitasaun Komunitaria hodi hasae kresimentu ekonomiku ho inkluzivu.

Ikus liu hatoo agradesmentu wain ba Governu Korea no Sentru Saemaul Undong ba apoiu tomak neebe halo ona ba povu Timor-Leste liuhusi apoiu finansiamentu no tekniku hodi fó kbit atu hasae produtividade no kreatividade Timor-oan nian hodi dudu kreximentu ekonómiku no prosperiedade povu rai doben ida nee.

Akompaña Vise-Primeiru Ministru hodi partisipa Saemaul Global Leadership Forum (SGLF 2023) maka, Assesora Prinsipal Sra. Idelta Maria Rodrigues, Asesor Planeamentu no Finansas Sr. Frederick Nelson Mandela no Embaixadór Timor iha Korea do Sul, Sr. Gregorio J. C. F. de Sousa.

𝐌𝐞𝐝𝐢𝐚 𝐕𝐏𝐌-𝐌𝐂𝐀𝐒-𝐌𝐃𝐑𝐇𝐂