𝐕𝐢𝐬𝐞-𝐏𝐫𝐢𝐦𝐞𝐢𝐫𝐮 𝐌𝐢𝐧𝐢𝐬𝐭𝐫𝐮 𝐏𝐚𝐫𝐭𝐢𝐬𝐢𝐩𝐚 𝐊𝐌 𝐄𝐱𝐭𝐫𝐚-𝐎𝐫𝐝𝐢𝐧𝐚𝐫𝐢𝐮 𝐇𝐨𝐝𝐢 𝐀𝐩𝐫𝐨𝐯𝐚 𝐏𝐫𝐨𝐣𝐞𝐭𝐮 𝐃𝐞𝐤𝐫𝐞𝐭𝐮 𝐆𝐨𝐯𝐞𝐫𝐧𝐮 𝐊𝐨𝐧𝐚-𝐛𝐚 𝐄𝐳𝐞𝐤𝐮𝐬𝐚𝐮𝐧 𝐎𝐉𝐄 𝟐𝟎𝟐𝟒

𝐃𝐢𝐥𝐢,𝟏𝟓/𝟎𝟏/𝟐𝟎𝟐𝟒: Vice-Primeiro Ministro, Ministro Coordenados dos Assuntos Sociais, Ministro do Desenvolvimento Rural e Habitação Comunitária, Eng. Mariano ASSANAMI Sabino, partisipa enkontru Konsellu Ministrus (KM), Extra-ordináriu nian iha loron 15 fulan-Janeiru, 2024, hodi aprova ona projetu Dekretu Governu, ne’ebé aprezenta husi Ministra Finansas, Santina José Rodrigues F. Viegas Cardoso, kona-ba Ezekusaun Orsamentu Jerál Estadu (OJE), ba tinan 2024, ne’ebé aprova husi Lei númeru. 21/2023, loron 27 fulan-Dezembru.

Projetu Dekretu-Lei ida-ne’e ho objetivu atu estabelese regra kona-ba ezekusaun OJE 2024. Iha tinan 2024, sei konklui desentralizasaun funsaun pagamentu, ho servisu no entidade hotu ne’ebé ho autonomia finanseira alargada ne’ebé assume hodi halo ninia pagamentu rasik, ho exesaun pagamentu remunerasaun sira, ne’ebé kontinua halo husi Diresaun-Jerál Tezouru.

Mudansa ida-ne’e sei permite Diresaun-Jerál Tezouru konsentra iha atribuisaun jestaun tezouraria no monitorizasaun ezekusaun orsamentál nian, ne’ebé nu’udar melloria kualitativa importante ida iha jestaun finansas públikas.

Diploma ne’e mós halo ajuste ki’ik iha prosedimentu ezekusaun orsamentál nian, tuir revizaun ba Lei númeru. 2/2022, loron 10 fulan-Fevereiru, liu-liu kona-ba alterasaun orsamentál.

Ikusliu, KM aprova projetu Rezolusaun Governu, ne’ebé aprezenta husi Vise-Ministra Solidariedade Sosiál no Inkluzaun, Céu Brites, kona-ba Ezonerasaun Longuinhos Armando S. I. Leto husi kargu Prezidente Konsellu Administrasaun Institutu Nasionál Seguransa Sosiál.

𝐌𝐞𝐝𝐢𝐚 𝐕𝐏𝐌-𝐌𝐂𝐀𝐒-𝐌𝐃𝐑𝐇𝐂