𝐌𝐃𝐑𝐇𝐂 𝐒𝐨𝐬𝐢𝐚𝐥𝐢𝐳𝐚 𝐏𝐫𝐨𝐠𝐫𝐚𝐦𝐚 𝐃𝐞𝐳𝐞𝐧𝐯𝐨𝐥𝐯𝐢𝐦𝐞𝐧𝐭𝐮 𝐑𝐮𝐫𝐚𝐥 𝐧𝐨 𝐇𝐚𝐥𝐨 𝐃𝐢𝐚́𝐥𝐨𝐠𝐮 𝐊𝐨𝐦𝐮𝐧𝐢𝐭𝐚́𝐫𝐢𝐚

Lautem, 𝟐𝟔/𝟎𝟏/𝟐𝟎𝟐𝟒: Ministériu do Desenvolvimento Rural e Habitação Comunitária (MDRHC), realiza atividade sosializasaun programa dezenvolvimentu rural no hala’o mós diálogu komunitária hodi rona komunidade nia opiniaun relasiona ho programa refere, iha Suku Luro, Postu Administrativu Luro, Munisípiu Lautem.

Ministro MDRHC Eng. Mariano ASSANAMI Sabino, hatete, prosesu dezenvolvimentu nasionál la’o durante tinan 20-resin ona, governu troka malu, maibé IX Governu mak foin ba da-huluk kria ministériu espesifiku ida hodi haree liu ba dezenvolvimentu rural.

Durante ne’e dezenvolvimentu iha setór edukasaun, saúde, infraestrtura bazika sira hanesan, Bee-moos, eletrisidade, estrada no sira seluk tan, la’o to’o ona iha suku no aldeia, entaun ministériu ne’e mai atu organiza hodi adjusta programa sira ho integradu.

“Ministériu Dezenvolvimentu Rural nia objetivu principal mak atu halo movimentu ho povu servisu makas lori moris di’ak nune’e povu bele iha integridade,” dehan, Ministro MDRHC, iha Salaun Parokia Luro.

Vise-Primeiru Ministru informa, ministériu ne’e nia aprosimasaun mak atu kapasita, hasa’e koñesementu povu nian atu hatene potensialidade hotu-hotu ne’ebé sira iha hodi dezenvolve nune’e bele fó kbi’it ekonomiku ba sira iha futuru.

Ministeriu ida ne’e sei halo movimentu ho povu iha ne’e, la signifika katak sei halo mesa-mesak dezenvolvimentu iha ne’e, maibé sei servisu hamutuk ho ministeriu hotu-hotu atu bele implementa nia programa tuir prioridade ne’ebé aldeia no suku iha, ezemplu, joven hakarak atu dezenvolve sira nia talentu mak sei liga Ministériu Juventude Desportu Arte Kultura, atu sira bele haree, agrikultura sei servisu hamutuk ho Ministeriu Agrikltura, Estrada sei ko’alia ho Ministeriu Obras Públika atu tau atensaun, tanba ne’e MDRHC ne’e mai atu organiza ida ne’e.

Programa dezenvolvimentu rural ohin implementa iha Postu Luro, suku lima, ho nia aldeia hamutuk 21, aumenta ho Aldeia Narun-teinu/Soruwaku, maske ne’e tama Postu Lautem, maibé tanba besik Suku Afabubu entaun nia mós tama iha tarjetu.

Programa ne’e importante tebes, tanba ne’e xefe suku no aldeia sira hahú husi ohin ba oin presiza tuur hamutuk ona identifika potensia sira suku nian, nune’e ba oin bele aprejenta ba tekniku sira ne’ebé sei mai servisu hamutuk ho inan aman sira iha baze.

Programa ne’e sei implementa mós iha fatin seluk, entaun sei mosu kompetisaun makas, se mak susesu nia fatin mak sei sai laboratóriu atu suku seluk bele halo peskiza para sai modelu dezenvolvimentu ba suku seluk.

Husu ba autoridade lokal, inan aman, joven sira ne’ebé involve arte marsial sira atu fó liman ba malu kria paz iha ida-idak nia aldeia, suku hodi kontribui ba dezenvolvimentu nasional, espesial iha imi nia aldeia.

Partisipa iha programa sosializasaun dezenvolvimentu rural no dialogu komunitaria ne’e mak hanesan, Vise-Ministru Komersiu Industria, Sekretariu Estadu Pekuaria, Sekretariu Estadu Ministério da Agricultura Pecuâria Pescas E Florestas, Vise-Prezidente CCI-TL, PAM Lautem, APA Luro, Diretor Telemor, Xefe suku nain lima no populasaun sira no seluk tan.

𝐌𝐞𝐝𝐢𝐚 𝐕𝐏𝐌-𝐌𝐂𝐀𝐒-𝐌𝐃𝐑𝐇𝐂