𝐌𝐢𝐧𝐢𝐬𝐭𝐞́𝐫𝐢𝐮 𝐃𝐞𝐳𝐞𝐧𝐯𝐨𝐥𝐯𝐢𝐦𝐞𝐧𝐭𝐮 𝐑𝐮𝐫𝐚𝐥 𝐋𝐚𝐧𝐬𝐚 𝐏𝐫𝐨𝐠𝐫𝐚𝐦𝐚 𝐇𝐚𝐛𝐢𝐭𝐚𝐬𝐚𝐮𝐧 𝐊𝐨𝐦𝐮𝐧𝐢𝐭𝐚́𝐫𝐢𝐚 𝐢𝐡𝐚 𝐒𝐮𝐤𝐮 𝐀𝐮𝐛𝐞𝐨𝐧

𝐃𝐢𝐥𝐢,𝟏𝟐/𝟎𝟐/𝟐𝟎𝟐𝟒: Governu liu husi Ministério do Desenvolvimento Rural e Habitação Comunitária, (MDRHC), lansa programa abitasaun komunitária iha Suku Aubeon, Postu Administrativu Bariki, Munisípiu Manatuto.

Iha lansamentu ne’e, hala’o mós sosialiazasaun ba programa MDRHC no Dialogu Komunitaria hodi rona komunidade nia hanoin relasiona ho programa ne’ebé atu implementa iha sira nia suku.

Lansamentu programa Dezenvolvimentu Rural no Habitasaun Komunitaria hala’o ona iha Postu Administrativu Luro, Munisípiu Lautem no ohin hala’o tan iha Suku Aubeon.

Tuir planu Programa Dezenvolvimentu Rural ba 2024 nian sei implementa iha aldeia hamutuk 70 ne’ebé identifikadu iha munisípiu neen (6), no Habitasaun Komunitaria nian ba 2024 aprova ona uma hamutuk 90 ho nune’e, uma 50 sei hari’i iha Suku Aubeon, no uma 40 seluk sei hari’i iha SP2 Manu-fahi, no Tunu-Bibi Bobonaro.

Enkuantu ekipa tekniku sira elabora ona katak, uma ne’ebé atu hari’i ho orsamentu kada uma hamutuk rihun $40.

“Aubeon ita sei implementa programa rua ne’e hotu, iha fatin séluk implementa programa habitasaun, maibé la implementa programa dezenvolvimentu rural, balun fali iha programa dezenvolvimentu rural maibé la iha programa habitasaun,” dehan VPM, iha Sede Suku Aubeon.

Suku Aubeon kompostu husi aldeia rua, objetivu entaun primeiru halo dialogu ho povu atu sira kompriende didi’ak, tanba Dezenvolvimentu Rural la’os sektoral hanesan edukasaun no saúde, agrikultura, maibé ne’e hanesan ministériu territorial.

Dezenvolvimentu Saúde, Edukasaun, Agrikultura, Bee-moos, eletrifikasaun no estrada mai ona iha kraik, ne’ebé hanoin katak Dezenvolvimentu Rurais ninia objetivu prinsipál mak oinsá mobiliza, sinkroniza, harmoniza no koordena dezenvolvimentu hotu-hotu iha kraik atu fó moris ba povu.

Liu husi dialogu ne’e komunidade hotu-hotu bele fó ninia ideia tanba partisipasaun povu importante, dezenvolvimentu rural hahú mudansa husi kakutak, hanoin ho asaun partisipativu povu nian.

Hein katak xefe Suku, lia na’in sira, liu-liu Prezidente Autoridade Munisípal apoiu malu hodi programa ne’e bele susesu hodi fó moris ba povu ho sustentabilidade.

𝐌𝐞𝐝𝐢𝐚 𝐕𝐏𝐌-𝐌𝐂𝐀𝐒-𝐌𝐃𝐑𝐇𝐂