𝐆𝐨𝐯𝐞𝐫𝐧𝐮 𝐈𝐧𝐭𝐞𝐠𝐫𝐚 𝐀𝐇𝐇𝐀 𝐄𝐝𝐮𝐜𝐚𝐭𝐢𝐨𝐧 𝐁𝐚 𝐏𝐫𝐨𝐠𝐫𝐚𝐦𝐚 𝐃𝐞𝐳𝐞𝐧𝐯𝐨𝐥𝐯𝐢𝐦𝐞𝐧𝐭𝐮 𝐑𝐮𝐫𝐚𝐥

DILI,14/02/2025: Ministro do Desenvolvimento Rural e Habitação Comunitária (MDRHC), Eng. Mariano ASSANAMI Sabino, sei Integra AHHA Education ba Programa Ministerio do Desenvolvimento Rural atu hanorin lian Ingles, Portuges no Siensia Vida ba joven sira iha aldeia ne’ebe sai alvu ba implementasaun programa dezenvolvimentu rural nian.

Iha intervensaun Vise-Primeiru Ministru, fo votus apresiasaun ne’ebe as ba AHHA Education nia ejistensia ho misaun importante ne’ebe hakarak apoiu foinsa’e sira ho lian Ingles no ohin aumenta tan materia hanesan lian Portuges no Siensia Vida ne’ebe importante ba dezenvolvimentu karakter iha Timor.

Iha palestra ne’e Vise-Primeiru Ministru konta historia ukun rasik an nian oinsa historia pasadu ne’e sai hanesan inspirasaun hodi motiva joven sira hametin nasionalizmu no patriotizmu hodi reforsa prinsipiu libertasaun povu, tanba ne’e joven sira tenke hatene substansia konstrusaun ba paz, Konstrusaun karakter, konstrusaun estadu, no Konstrusaun Nasaun ne’ebe sai hanesan baze fundamentu ba dezenvolvimentu nasional.

AHHA Education sai ona parseiru governu nian ne’ebe durante ne’e hola parte iha prosesu dezenvolvimentu liu-liu iha area edukasaun non formal nian, tanba ne’e governu rekonese partisipasaun ida ne’e sei haluan tan koperasaun servisu ba oin.

Ministeriu Dezenvolvimentu Rural iha ona akordu ho AHHA Education sei ba iha aldeia alvu sira hodi hanorin, ohin iha Postu Administrativu Luro, Munisipiu Lautem, hahu ona konstrui uma bainhira remata sei inisia prosesu aprendijazen, Ministeriu Edukasaun loke dalan ona atu AHHA Educationa hanorin labarik sira hahu husi pre-primaria no seluk iha tempu badak AHHA Education sei iha akordu ho UNPAZ atu bele fo formasaun mos ba estudante sira.

Alende ne’e, Ministro do Desenvolvimento Rural mos kompromete sei marka tan tempu ruma hodi diskute oinsa bele estabele kooperativa ida ne’ebe envolve mos alumni ka volontariu AHHA Education nian hodi azuda hadia sira nia ekonomia atu garantia moris familia nian ba futuru, tanba sira labele volontariu bebeik.

Marka prejensa iha seminariu ne’e marka prejensa husi formadores, formandu, volontarius husi munisipius no dirijentes AHHA Education rasik.