𝐆𝐫𝐮𝐩𝐮 𝐇𝐚𝐤𝐢𝐚𝐤 𝐅𝐚𝐡𝐢 𝐢𝐡𝐚 𝐁𝐨𝐛𝐨𝐧𝐚𝐫𝐮 𝐀𝐩𝐫𝐞𝐬𝐢𝐚 𝐡𝐨 𝐏𝐫𝐨𝐠𝐫𝐚𝐦𝐚 𝐃𝐞𝐳𝐞𝐧𝐯𝐨𝐥𝐯𝐢𝐦𝐞𝐧𝐭𝐮 𝐑𝐮𝐫𝐚𝐥

Bobonaro,07/06/2025: Algira Mendonça Danina nu’udar membru Grupu Haforsa Moris ne’ebe halo atividade pekuaria nian sente kontente no apresia tebes ba Programa Dezenvolvimentu Rural tanba bele apoiu ona hodi hadia sira nia ekonomia liu husi hakiak fahi.

Grupu ne’e ejiste iha Aldeia Korluli, Suku Rita-bou, Postu Administrativu Maliana Villa, Munisipiu Bobonaro, ho nia membru grupu hamutuk na’in 19, sira asesu ona orsamentu husi Sentru Dezenvolvimentu Aldeia (CDA), hamutuk rihun $19 ho maneira emprestimu.

Orsamentu ne’ebe grupu ne’e asesu mak utiliza ona ba hari’i uma, dada bee-moos, sosa hahan ba fahi inklui sosa fini ka fahi oan hamutuk 26 hodi hakiak.

Iha intervista benefisiariu sira deklara sei garantia nia sustentabilidade atu nune’e atividade ne’e la’o nafatin hodi sustenta sira nia nesesidade ekonomia lor-loron liu-liu oinsa bele hetan rendimentu ne’ebe naton hodi selu oan sira ba eskola.

Ekipa monitorizasaun ba atividade grupu produtor sira mak Xefe Gabinete Ministeriu Dezenvolvimentu Rural no Habitasaun Komunitaria, Leo da Costa Oliveira “Oli Lemorai” ho nia funsionariu sira.