𝐌𝐢𝐧𝐢𝐬𝐭𝐫𝐨 𝐌𝐃𝐑𝐇𝐂 𝐕𝐢𝐳𝐢𝐭𝐚 𝐆𝐫𝐮𝐩𝐮 𝐇𝐚𝐛𝐨𝐤𝐮𝐫-𝐊𝐚𝐫𝐚𝐮 𝐓𝐢𝐡𝐚𝐁𝐮𝐚

𝐌𝐀𝐍𝐔𝐅𝐀𝐇𝐈,𝟎𝟑/𝟎𝟖/𝟐𝟎𝟐𝟓: Ministro do Desenvolvimento Rural e Habitação Comunitaria, Eng. Mariano ASSANAMI Sabino, hala’o vizita servisu ba Grupu Habokur Karau ho naran Tihabua, hodi haree progresu servisu ne’ebe gropu ne’e atinze, iha Aldeia Webikas, Suku Klakuk, Postu Administrativu Fatuberliu, Munisipiu Manufahi.

Grupu ne’e rasik ejiste ona tinan ida resin konsege halo ona atividade hanesa kuda hahan karau nian mak hanesan ai-kafe no seluk tan, sosa karau no habokur karau hamutuk 15 ne’ebe orsamentu apoiu direita husi MDRHC ho total $ 16.046.

Iha sorumutu ne’e, Ministru MDRHC louva Dr. Flaviano Pereira Lopes ho nia grupu tamba bele organiza malu hodi hakiak no habokur hodi haforsa ekonomia iha baze.

Daudaun ne’e Timor-Leste tama ona ba ASEAN iha fulan-Outubru, tanba ne’e merkadu sei luan liutan, ema nia merkadu iha ita nia nasaun no ita nia merkadu iha mos ema nia nasaun tanba ne’e Timor-Leste presiza iha produtu atu lori ba merkadu.

Ministeriu MDRHC, nia prezensa iha aldeia sira atu ajuda identifika no dezenvolve produtu ekonomiku kada aldeia nian hodi fo moris diak ba povu iha futuru.

Tanba ne’e ba populasaun aldeia alvu ba programa MDRHC atu ida-idak kria grupu hodi halo atividade produsaun liu husi orsamentu Subvensaun publiku ne’ebe depozita ona iha Sentru Dezenvolvimentu Aldeia (CDA), no husu funsionariu Ministru nian ne’ebe destaka iha ne’e atu koopera ho populasaun, liu-liu autoridade komunitaria hodi dezeña planu no programa ne’ebe efisiensia no efikasia ba moris povu nian.