𝐕𝐢𝐬𝐞-𝐏𝐫𝐢𝐦𝐞𝐢𝐫𝐮 𝐌𝐢𝐧𝐢𝐬𝐭𝐫𝐮 𝐊𝐨𝐧𝐬𝐢𝐝𝐞𝐫𝐚 𝐒𝐞𝐭𝐨́𝐫 𝐏𝐫𝐢𝐯𝐚𝐝𝐮 𝐏𝐚𝐫𝐬𝐞𝐢𝐫𝐮 𝐈𝐦𝐩𝐨𝐫𝐭𝐚𝐧𝐭𝐞 𝐛𝐚 𝐃𝐞𝐳𝐞𝐧𝐯𝐨𝐥𝐯𝐢𝐦𝐞𝐧𝐭𝐮 𝐄𝐤𝐨𝐧𝐨𝐦𝐢𝐚 𝐢𝐡𝐚 𝐓𝐢𝐦𝐨𝐫

𝐃𝐢𝐥𝐢, 𝟐𝟖/𝟎𝟗/𝟐𝟎𝟐𝟑: Vice-Primeiro Ministro, Ministro Coordenadór dos Assuntos Sociais, Ministro do Desenvolvimento Rural, Habitação Comunitária Eng. Mariano ASSANAMI Sabino, reprejenta Sua Exelensia Xefe Governu, Kay Rala Xanana Gusmão, partisipa seminariu nasional ho tema “Promove Setór Privadu ba Ekonomia Sustentavel iha Timor-Leste”.

Siminariu loron ida nee koalia liu kona-ba assuntu Esplora Oportunidade Negosiu no Partisipasaun Konteudu Lokal iha Setór Petroliferu no Gas, iha Timor-Leste neebé organiza husi TradeInvest Timor-Leste no Assosiasaun Emprezarial Muller Timor-Leste.

Iha intervensaun Vice-Primeiro Ministro, hatete, setór Privadu nudar parseiru importante governu nian, tanba nee liu husi seminariu sira hanesan nee atu koalia nakloke ba malu oinsá bele servisu hamutuk hodi dezenvolve setór save importante sira.

Ohin iha seminariu nee atu diskute klean liu tan ba setór petroliferu nian, maibé sei la taka dalan atu koalia setór sira seluk hanesan agrikultura tanba too ohin loron seidauk bele auto sufisiente ba ai-han neebé ida nee presiza halo mós diskusaun.

Governu nia funsaun atu garantia estabilidade politika, seguransa, ekonomia atu nune’e setór privadu sira bele hamutuk ho governu hodi hateke ba oin, governu mós iha papel importante kria politika empregu hodi emprega joven sira, maibé ne’e hotu setór privadu mak sei hala’o, governu hein kontrola no kria kondisaun oinsa setór provadu sira bele hambrik seguru para bele hasae kresimentu ekonomia rai laran.

“Ha’u lori Primeiru Ministru nia naran hato’o parabens ba setór privadu sira hotu ne’ebé partisipa iha seminariu ida ne’e, setór privadu la’os iha governu nia okos maibé parseiru governu nian ne’ebe iha responsabilidade hanesan hodi servisu, Primeiru Ministru orienta membru governu hotu-hotu karik setor privadu sira presiza tenke ba hodi ko’alia, diskute buka solusaun saida mak sira presiza” dehan VPM, iha Salaun Multiuzus GMN, Bebora.

Governante ne’e informa, bainhira setor privadu sira husu ba koalia ho sira fomal ka informal ba ko’alia, buka dalan hotu-hotu oinsá hamutuk reduz númeru ki’ak ne’ebe sa’e ba bebeik, presiza la’o hamutuk ba to’o iha kraik hodi hatene kiak ne’e to’o iha ne’ebé no oinsá mak bele rezolve, maiske ita iha servisu keta-ketak balun politiku, balun sai emprezariu maibe objetivu ida de’it.

Entaun iha diskursu Governadór Banku Sentral dehan ona sei kria kondisaun hotu-hotu para depois kria kondisaun oinsá fasilita setor privadu sira bele asesu ba banku hodi halo kreditu ho kriteria sira ne’ebe simples nune’e emprezariu sira bele halo investimentu.

Tanba dadaun ne’e joven barak iha inisiativa hakarak fila-liman maibe problema iha finanseiru entaun BCTL iha knar no responsabilidade atu haree ida ne’e oinsá empreza sira ne’e bele lao to’o kraik nune’e empregu barak iha kraik mak osan sei sei sirkula iha ne’eba ekonomia sei bele la’o di’ak.

Vise-Primeiru Ministru orienta atu banku sira bele fasilita diak liutan pekena no mediu empreza sira atu moris barak liutan sei garantia ekonomia mais sustentavel.

𝐌𝐞𝐝𝐢𝐚 𝐕𝐏𝐌-𝐌𝐂𝐀𝐒-𝐌𝐃𝐑𝐇𝐂