Polítika abitasaun Timor-Leste nian evolui liuhosi períodu istóriku oioin. Iha tempu portugés nia ukun, área urbana sira dezenvolve ho uma ne’ebé estruturadu. Iha okupasaun Indonézia nia okos, governu introdús projetu uma sira ne’ebé hanesan RSS (Ruma Sangat Sederhana) no PERUMNAS. Maibé, hafoin referendu 1999, krize polítika no militár estraga uma 40%, hodi halo ema rihun ba rihun sai hosi uma. Hafoin independénsia iha tinan 2002, dezafiu abitasaun mosu, tanba migrasaun urbana aumenta makaas no infraestrutura iha Dili ne’ebe sei falta, no mos vulnerabilidade klimátika. Iha tinan 2007, governu adopta Polítika Nasionál kona ba Abitasaun hodi asegura uma ne’ebé baratu, reziliente, no sustentável ba komunidade sira, liuliu iha área rurál sira

iha artigu númeru 58 Konstituisaun RDTL hateten: “Ema hotu-hotu iha direitu ba niaan rasik no ba nia familia, ba habitasaun ( ka uma ) diak ida ho luan ne’ebé naton, ho kondisaun Ijiene no konfortu, ne’ebé bele prezerva intimidade pessoal no privasidade familia nian.”. Tanba ne’e orientasaun no ajenda ba Programa Habitasuan Komunitária liu husi IX Governu Konstitusional nian mak hanesan tuirmai: Revee politika nasional ba habitasaun, tinan 2007 nian hodi dezenvolve Programa Nasional Habitasaun, ne’ebé inklui kestaun sustentabilidade, hodi garante, tuir prazu, habitasaun ne’ebé dignu ba Timor oan hotu ho asesu bee mos ho tanke rezervatóriu, instalasaun saneamentu individual (haris fatin), koziña ka dapur , eletrisidade ho nível konfortu ne’ebé tuir padraun modernu; Kria regulamentu hodi estabelese rekizitu mínimu, atu harii no asegura konstrusaun uma, hodi hadia kualidade habitasaun dignu; Haree didiak fali no reforma programa kona-ba Objetivu Dezenvolvimentu Miléniu (MDGs ) no Planu Estratéjiku Dezenvolvimentu ( PED 2015-2030); Kria no implementa pograma apoiu ba rehabilitasaun no konstrusaun uma hodi hadia kualidade hela fatin; Introduz tékniku modernu ho material konstrusaun ne’ebé tuir padraun ne´ebé iha no tuir kultura tradisaun ho klima Timor-leste, envolve partisipasaun komunidade lokal durante prosesu hotu; Halo estudu no implementa programa kona-ba promosaun atu harii uma husi investidores privadu sira, iha fatin foun, liu husi planu urbanizasaun ne’ebe planeadu no ho infrastrutura hotu ne’ebé hetan ona aprovasaun; Asegura akompañamentu permanente ba komunidade sira , relasiona ho maneira oinsá habitasaun bele akomoda animal hakiak. No mos forma no sensibiliza líderes komunitaáiu ho xefe familia kona-ba kestaun saude públika, ne’ebé asosia ho konvíviu (ka moris hamutuk ) ho animal. Promove polítika kona-ba habitasaun saudável, no bairu ne’ebé inovador no integradu; Fo apoiu ba komunidade, aldeia no suku sira kona-ba dezenvolvimentu habitasaun komunitária.