Dili, 15/08/2023: Vice-Primeiro Ministro, Ministro Coordenadór dos Assuntos Sociais e Ministro Desenvolvimento Rural e Habitação Comunitária Eng. Mariano Assanami Sabino, simu vizita husi ekipa Asian Development Bank (ADB), iha Palasiu Governu.
Iha enkontru ne’e parte rua diskute assuntu importante rua mak hanesan, kombate má-nutrisaun no dezenvolve bee-moos ba komunidade sira iha área urbana no rural iha futuru.
Country Director ADB, Stefania Dina, infroma, Vise-Primeiru Ministru hakarak ba oin dezenvolvimentu tenke integradu, hahú husi aldeia entaun ADB apoiu tebes inisiativa ida ne’e hodi halo koordenasaun ne’ebé di’ak nune’e bele implementa programa má-nutrisaun iha futuru.
ADB mós ko’alia ho Vise-Primeiru Ministru kona-ba assuntu dezenvolvimentu bee-moos iha área urbana ho rural no informa mós ADB nia apoiu projetu bee-moos ne’ebé la’o hela iha Dili, Same, Vikeke no Lospalos.
Alende ne’e, aprejenta mós planu ne’ebé atu implementa iha futuru liu-liu kestaun bee-moos nian iha, Ainaru, Suai, no Maliana, maibé sei diskute ho Ministeriu Finansas.
ADB mós informa ba Sua. Exelensia hakarak identifika programa prioridade sira hamutuk ho governu halo planu investimentu iha futuru.
Enkuantu, Vise-Primeiru Ministru, agradese ba ADB ne’ebé hatudu ninia komitmentu hodi apoiu Timor nia dezenvolvimentu iha futuru.
“Ohin ami halo diskusaun assuntu rua importante ko’alia kona-ba má-nutrisaun no bee-moos,” dehan Vise-Primeiru Ministru.
Kestaun bee-moos sai preokupasaun boot ne’ebé seidauk rezolve, maiske aloka ona osan boot, iha Dili parte Post Administrativu Dom Aleixo aloka ona tokon $127 ba bee moos no tokon $50 aloka ba Lopalos Same no Vikeke, maibe ne’e sei iha kapital munisipiu de’it.
Planu ba oin kanalizasaun bee-moos ne’ebé fornese ba uma kain ida-idak tenke standarte H20 nune’e bele hemu direita.
Enkuantu ba má-nutrisaun nian presiza halo aprosimasaun integradu ho ministeriu relevante sira hanesan, Ministériu Agrikultura Ministériu Edukasaun, Ministériu Saúde.
Iha governasaun ne’e dezenvolvimentu tenke integradu no aprosimasaun ne’ebé regular, governu tomak tenke solidu hodi fornese servisu ne’ebé di’ak ba povu, maibé la’os governu de’it povu tomak, partidu polítku, sosiedade sivil, igreza, veteranus hotu-hotu tenke servisu hamutuk kombate kiak, no kombate má-nutrisaun iha Timor.
Media V-PM-MCAS-MDRHC
