𝐃𝐢𝐥𝐢, 𝟐𝟑/𝟎𝟖/𝟐𝟎𝟐𝟑: Vice-Primeiro Ministro, Ministro Coordenadór dos Assuntos Sociais e Ministro Desenvolvimento Rural e Habitação Comunitária Eng. Mariano ASSANAMI Sabino, simu vizita ofisial Diretór Unidade Estratejia Parseria World Food Programme (WFP), Mr. Stanlake husi Roma.
Iha sorumutu nee parte rua troka ideias oinsá hametin relasaun servisu bilateral iha futuru, neebé sei foku ba assuntu social nian liu-liu kona-ba seguransa alimentár.
Iha intervita, Diretór Unidade Estratejia Parseria WFP, Mr. Stanlake Samkange, sente kontente tanba antes nee nia mai ona Timor iha tinan hirak liuba, ohin mai fila fali hodi kontinua servisu neebé antes nee lao tiha ona.
“Iha tinan hirak liuba hau mai ona Timor, ohin hau mai fila-fali atu haree oinsá mak WFP bele suporta governu iha tempu agora, liu-liu iha area seguransa alimentar oinsá atu eradika má-nutrisaun, stunting no oinsá atu eleva ekonomia iha Timor,” dehan, Mr. Stanlake, iha Palasiu Governu.
Diretór estratejia WFP nee informa, atu hasae kuantidade produsaun iha rai laran hodi garantia seguransa alimentar nee laos parte ida nia responsabilidade mesak, maibé presiza parte hotu servisu hamutuk hodi integra programa sira.
Tuir WFP problema global neebé akontese afeta mós ba Timor-Leste, tanba nee ba kestaun seguransa alimentar nian presiza analiza impaktu global no lokal nian, nunee presiza servisu hamutuk ho parseiru sira oinsá aliña elementu ba soberania alimentar iha Timor.
Iha fatin hanesan, Vise-Primeiru Ministru, hatete, ohin enkontru ho Diretór Unidade Estrateziku Parseria WFP neebé mai husi Roma, diskute issue sira neebé importante ba Timor atu halo aprosimasaun hodi halo asaun neebé integradu mak hanesan, seguransa alimentar, má-nutrisaun, no stunting.
Ba assuntu ida nee presiza servisu inter-ministerial nian, maske buat barak halo ona, maibé ba futuru presiza iha plata forma ba protesaun social nunee bele servisu hamutuk ba oin.
“Ita iha ona programa, merenda eskolár, bolsa da mãe, no ita iha instituisaun oi-oin tanba nee ita presiza halo ona asaun sira neebé organizadu, hodi sinkroniza planu programa hodi fó fatin ba ajensia sira atu it abele halo asaun hamutuk,” dehan Vise-Primeiru Ministru.
Enkuantu ba kestaun má-nutrisaun bee-moos sai esensial, tanba nee iha ona osan imprestimu no osan neebé apoiu husi MCA-TL, IP hodi investe ba bee-moos no saneamentu iha area urbana liu-liu iha Dili.
Ba asaun nee hatudu katak, governu no duadór sira fó atensaun, maibé governu mak lidera atu nunee asaun sira tenke integradu.
𝐌𝐞𝐝𝐢𝐚 𝐕-𝐏𝐌-𝐌𝐂𝐀𝐒-𝐌𝐃𝐑𝐇𝐂
