Partisipa Tomada de Pose KOFETIL iha Salaun Haksolok

Antes nee, liu husi Kongresu KOFETIL ba daruak nian kongresista sira hili Sra. Brigida Antonia Correia, eleita sai Prezidente KOFETIL ba tinan tolu hahú husi 2023-2026.

Iha tomada de pose, Vise-Primeiru Ministru, enkoraza membru kooperativa tomak tenke badinas, kreativu no inovativu iha negosiu.

“Hau lori IX Governu Konstitusionál kongratula estrutura KOFETIL neebé ohin simu ona pose, ba governu dalan nakloke ba ita boot sira bainhira presiza, kooperativa nee modelu ekonomia social, neebé ba oin ita sei koopera malu,” dehan Vise-Primeiru Ministru.

Nudar Ministru Dezenvolvimentu Rural, nia organika iha Kosellu Konsultativu nee ba interna ministáriu nian no Konsellu Koordenasaun iha neeba sei loke dalan mós ba CCI-TL, KOFETIL no SEcooP bele tama iha neeba.

Iha organika IX Governu Konstitusionál kria ministériu foun ho naran Ministeriu Dezenvolvimentu Rural no Abitasaun Komunitária, ministériu ida nee sei haree liu ba área rurais, entaun dezenvolvimentu sai deit ba iha kraik presiza halo koordenasaun, saida mak halo tiha ona no saida mak presiza atu halo tan.

Iha ministeriu ida nee laos atu ba halo mesa-mesak dezenvolvimentu iha área rural neeba, maibé ministeriu nee mosu atu halo koordenasaun entaun husi nee mak KOFETIL nee importante, tanba hanoin atu hamoris ekonomia hahú husi eskala kiik no mediu iha baze.

Nasaun sira neebé ho baze ekonómia neebé forte nee mai husi ekonomia kiik no mediu nee bainhira mosu krize mundial sira bele kontinua ejiste bele halo nafatin fornesimentu ba rai laran, entaun husi kiik ba mediu loron ruma sei sai boot nunee ita bele iha ona soberania ekonomia.

Ministru Koordenadór Assuntu Sosial informa, maiske servisu Kooperativa nee iha MKAE nia okos, maibé ekonomia rai laran lao ladiak mak sei hamosu mós problema social balun hanesan, má-nutirisaun, raes badak, nee presiza iha liña koodenasaun atu nunee bele kombate.

“Haree husi potensia sira nee hotu hanoin katak ita tenke hamutuk servisu iha ekipa, hodi fahe tarefa servisu sira, maibé ita tenke organiza, konsolida atu ita bele hatene se mak halo ida nee no semak halo ida neeba,” nia informa.

Nudar emprezariu bainhira ema ida halo ona negosiu ida, labele hotu-hotu halai ba ida, maibé haree oportunidade neebé ema seidauk halo bele investe iha neeba.

Tanba nee, agardese ba feton Timor oan sira neebé iha komitmentu kontinua kosolida aan iha vida negosiu nian, lori governu nia naran hatoo parabens i bom susesu ba hotu-hotu.

𝐌𝐞𝐝𝐢𝐚 𝐕𝐏𝐌-𝐌𝐂𝐀𝐒-𝐌𝐃𝐑𝐇𝐂