𝐌𝐢𝐧𝐢𝐬𝐭𝐫𝐮 𝐌𝐃𝐑𝐇𝐂 𝐎𝐛𝐬𝐞𝐫𝐯𝐚 𝐑𝐞𝐡𝐚𝐛𝐢𝐥𝐢𝐭𝐚𝐬𝐚𝐮𝐧 𝐔𝐦𝐚 𝐓𝐫𝐚𝐝𝐢𝐬𝐢𝐨𝐧𝐚𝐥 𝐢𝐡𝐚 𝐒𝐮𝐚𝐢 𝐋𝐨𝐫𝐨

𝐊𝐎𝐕𝐀𝐋𝐈𝐌𝐀,𝟐𝟒/𝟎𝟕/𝟐𝟎𝟐𝟔: Ministru Dezenvolvimentu Rural no Habitasaun komunitaria (MDRHC), Eng. Mariano ASSANAMI Sabino, ne’ebe akompaña husi Sekretariu Estadu Floresta, hala’o monitorizasaun ba rehabilitasaun uma tradisional ne’ebe ho lian tetun terik “Uma Laleo masin” ka uma hela fatin, ne’ebe konstrui iha Suku Suai Loro, Postu Administrativu Suai-Villa, Munisipiu Kovalima.

Iha monitorizasaun ne’e, Ministru MDRHC mós halo konversa ho Badaen no benefisiariu sira hodi rona sira nia preokupasaun relasiona ho prosesu rehabilitasaun uma tradisional refere.

Preokupasaun ne’ebe sira hato’o mak kona-ba mobilizasaun material tradisional sira ne’ebe tarde liu-liu hanesan ai sira ne’ebe atu tesi hodi halo ai-rin uma maibe ne’e sei iha relasaun ho floresta entaun difikulta sira hodi aselera prosesu konstrusaun refere.

Relasiona ho assuntu ne’e mak parte rua sei halo kordenasaun oinsa bele apoiu malu hodi labele difikulta prosesu konstrusaun uma tradisional ne’e.

Alende ne’e, Ministru MDRHC mós husu ba komunidade sira liu-liu autoridade komunitaria sira atu servisu hamutuk ho kompaña implementador atu nune’e bele finaliza lalais obra ne’e tuir ninia tempu.

Husu mos ba komunidade atu kontinua servisu hamutuk (Gotong Royong) ne’ebe sai ona kultura Timor nian ne’ebe beiala sira husik hela mai jerasaun sira presiza konserva no kontinua ba oin nafatin.

Alende ne’e, Ministru mos husu ba kompaña atu buka nafatin mantein utiliza material tradisional hodi garantia nafatin valores kultural uma ne’e nian.

Akompaña Ministru MDRHC mak Xefe Gabinete MDRHC, Leo da Costa Oliveira, Diretor Jeral MDRHC Filipe Cardoso Vieira, Diretor Jeral Korporativus no sira seluk tan.