𝐆𝐨𝐯𝐞𝐫𝐧𝐮 𝐇𝐚𝐦𝐮𝐭𝐮𝐤 𝐡𝐨 𝐄𝐦𝐩𝐫𝐞𝐳𝐚 𝐈𝐦𝐩𝐨𝐫𝐭𝐚𝐝𝐨́𝐫 𝐑𝐞𝐚𝐥𝐢𝐳𝐚 𝐄𝐧𝐤𝐨𝐧𝐭𝐫𝐮 𝐇𝐨𝐝𝐢 𝐍𝐨𝐫𝐦𝐚𝐥𝐢𝐳𝐚 𝐏𝐫𝐞𝐬𝐮 𝐅𝐨𝐬

𝐃𝐢𝐥𝐢,𝟐𝟖/𝟎𝟗/𝟐𝟎𝟐𝟑: Nonu governu Konstitusionál hamutuk ho Empreza importadór sira konkorda malu ona sei hatun folin fos iha merkadu nivel teritoriu laran tomak.

Folin fos ne’ebé sa’e makas sai preokupasaun boot ba sosiedade tomak, nune’e liu husi Konsellu Ministru Primeiru Ministru orienta Ministru relevante sira atu servisu hakas an hodi rezolve assuntu ne’e ho lalais.

Nune’e loron tuir mai Vice-Primeiro Ministro, Ministro Coodernador dos Assuntos Sosiais, Eng. Mariano ASSANAMI Sabino, Vice-Primeiro Ministro Assuntos Economico em exersisiu, Eng. Miguel Manetelu no Ministru Komersiu Industria (MCI) Dr. Nino Pereira, ezekuta orientasaun Xefe Governu nian hodi konvoka enkontru ho kompaña importador sira hodi diskute kestaun ne’e.

Hafoin enkontru, iha entervista Ministeriu MCI, Dr. Nino Pereira “Pregu” hatete, iha fulan hirak nia laran problema ne’ebe sai polemika liu-liu folin fos ne’ebé sa’e medidas hotu governu halo to’o ona iha konkluzaun ida ba normalizasaun presu fos iha Timor.

Horseik liu husi enkontru Konsellu Ministru aprova ona dekretu lei ida nudar matadalan ba medidas intervensaun temporariu presu fos.

“Sua exelensia hatun orientasaun prazu loron tolu, ba Ministeriu MCI ho desizaun sira ne’ebé ita haree importante duni atu ita bele sai husi situasaun ida ne’e, tanba ne’e ohin ita enkontru ho Vise-Primeiru Ministru nain rua ho kompaña importador ne’ebé iha koperasaun di’ak halo ona enkontru lubuk ida hodi garante katak presu ida ne’e ita sei normaliza, garante mos katak, stock ne’ebé mak iha bele atende ba ita nia nesesidade konsumu fos iha merkadu nivel Nasionál,” dehan, MCI iha, Palasiu governu.

Ne’ebe iha tempu badak bainhira Prezidente Republika dekreta ona dekretu lei ne’e mak governu sei foti medida hodi asegura presu fos ba teritoriu tomak ho baze kada kilograma $0,50 no fos karon ida ho 25gk ho presu $12.

“Ami iha ona konkordansia ho kompaña importador sira hatudu komitmentu boot tebes hodi ita bele delibera to’o retallu sira, ne’ebé aplikasaun ne’e ita sei hahú ho medidas balun ne’ebé ita sei la’o hanesan kontratu ne’ebé ita sei prepara hodi asegura medidas intervensaun halo hodi estabiliza presu fos iha ita nia nasaun,” Sr. Ministru ne’e subliña.

Konkordansia ne’ebe iha mak governu sei fo subsidiu $ 5.00 kada fos karon 25kg no sei buka dalan mos apoiu CLN nian oinsa fasilita tula fos sira ba munisipiu.

Tanba ne’e, sei orienta funsionariu MCI iha munisipiu sira atu rekolla dadus kompaña sira ne’ebé baibain faan fos, ne’ebe iha loron ida rua tan mai bele implemeta ona subsidiu ne’e para bele normaliza ona folin fos.

𝐌𝐞𝐝𝐢𝐚 𝐕𝐏𝐌-𝐌𝐂𝐀𝐒-𝐌𝐃𝐑𝐇𝐂