𝐌𝐚𝐥𝐚́𝐳𝐢𝐚 𝐏𝐫𝐨𝐧𝐭𝐮 𝐅𝐨́ 𝐀𝐬𝐢𝐬𝐭𝐞𝐧𝐬𝐢𝐚 𝐁𝐚 𝐃𝐞𝐳𝐞𝐧𝐯𝐨𝐥𝐯𝐢𝐦𝐞𝐧𝐭𝐮 𝐓𝐮𝐫𝐢𝐳𝐦𝐮 𝐊𝐨𝐦𝐮𝐧𝐢𝐭𝐚𝐫𝐢𝐮 𝐈𝐧𝐭𝐞𝐠𝐫𝐚𝐝𝐮 𝐢𝐡𝐚 𝐊𝐚𝐢𝐭𝐞𝐡𝐮

𝐋𝐢𝐤𝐢𝐬𝐚,𝟐𝟗/𝟎𝟖/𝟐𝟎𝟐𝟒: Ministro do Desenvolvimento Rural e Habitação Comunitária, Eng. Mariano ASSANAMI Sabino, hamutuk ho ekipa tekniku ministeriu nian aprezenta planu dezenvolvimentu komunitariu integradu iha Kaitehu, Likisa ba Vise-Primeiru-Ministru, Ministru Dezenvolvimentu Rural no Rejional Malázia, THE HONORABLE DATO’ SERI DR. AHMAD ZAHID BIN HAMIDI, iha Hotel Lauhata Beach.

Planu mestre ba dezenvolvimentu turizmu Komunitariu ne’ebe tekniku sira aprejenta ho kalkulu sei okupa rai kuaze hektares 10-resin parte tasi ibun Kaitehu ne’ebe sei konstrui, fatin ba kafetaria, kampu desportu, akuakultura ne’ebe kompleta ho fatin kail ikan, fatin ba aprejentasaun muzika, spot foto no sira seluk tan.

Vise-Primeiru Ministru Malázia, sente kontente bele vizita Likisa hodi haree potensia sira iha area ne’eba liu-liu haree direita produtu lokal sira.

Alende ne’e, aprejentasaun fatin ba planu futuru konstrusaun turizmu komunitaria ne’e importante tebes hodi hariku liutan area iha ne’e liu husi atividade oi-oin hodi bele fo redimentu ba populasaun iha suku.

Tanba ne’e, ohin ko’alia ona ho Prezidente Republika no Vise-Primeiru Ministru atu konvida autoridade lokal atu bele ba vizita Malázia hodi haree rasik transformasaun suku iha neeba, nune’e bele transforma suku sira iha Timor bele diak liutan ho nasaun sira iha Asean.

“Ita presiza apoiu makas ba joven sira atu estuda ka fo formasaun profesional iha area oi-oin atu sira bele dezenvolve nia suku tasik hodi fo moris diak ba nia familia rasik,” dehan V-PM, Malazia.

Ohin enkontru ho Prezidente Republika no Primeiru Ministru katak, Malazia nakloke apoiu Timor-Leste iha area saida deit bainhira aban bainrua Timor sai ona membru Permanente Asean atu ne’e ita bele hambrik hanesan no tuur mos hanesan iha Asean.

Iha fatin hanesan, Ministru Dezenvolvimentu Rurál no Abitasaun Komunitariu, Eng. Mariano ASSANAMI Sabino, agradese ba Vise-Primeiru-Ministru Ministru Malazia ne’ebe disponivel to’o iha Likisa maske kondisaun balun la favoravel.

“Vizita ne’e loloos mai iha Kaitehu atu haree dezenvolvimentu rurál ida iha ne’eba ohin ami troka informasaun, oinsa atu halo kapasitasaun no haree ba progresu sira hanesan dezenvolvimentu rurál iha Malázia bele lori mai implementa iha Timor-Leste,” dehan Ministru MDRHC

Ministru MDRHC informa, dezenvolvimentu Rural iha Malazia bele sai modelu ba Timor-Leste maibe ita mos iha karakter, dimensaun no valores rasik, ita iha objetivu prinsipál tanba depois tinan 20 mak foin hamosu Ministeriu Dezenvolvimentu Rurál ne’e mai atu kurize, harmoniza, integra no koordena hosi nivél aldeia atu nune’e dezenvolvimentu la’o ho di’ak.

Iha OJE 2024, preve orsamentu $50 mil ba aldeia alvu hamutuk 70 no iha tinan 2025 planeia aumenta ba 150 to’o 200 aldeia maibe ninia orsamentu sei iha prosesu.

Vizita iha Likisa hetan partisipasaun masimi husi Autoridade lokal no autoridade komunitaria lia nain, diretores, xefe Departamentu husi MDRHC, embaixador Malazia iha Timor no seluk tan.