𝐊𝐨𝐦𝐩𝐚𝐧̃𝐚 𝐇𝐚𝐡𝐮 𝐈𝐦𝐩𝐥𝐞𝐦𝐞𝐧𝐭𝐚 𝐏𝐫𝐨𝐣𝐞𝐭𝐮 𝐔𝐦𝐚 𝐃𝐢𝐠𝐧𝐮 𝐢𝐡𝐚 𝐌𝐚𝐧𝐮𝐟𝐚𝐡𝐢

Dili 27/11/2024: Kompaña manan nain Aimen Unip.Lda. JV Eliezer Unip. Lda. hahu tidin estaka (Bowplank), hodi konstrui Uma Dignu hamutuk 25, iha Aldeia Webikas, Suku Klakuk, Postu Administrativu Manufahi, Munisipiu Manufahi.

Tuir planu Ministerio do Desenvolvimento Rural e Habitação Comunitária (MDRHC), iha 2024 ne’e sei implementa projetu Uma Dignu iha Munisipiu Bobonaru, Manatutu no Manufahi.

Iha Munisipiu Manufahi kompaña hahu ona sukat rai no tidin estaka hodi inisia ona konstrusaun, prosesu ne’e la’o autoridade komunitaria, no komunidade sira ne’ebe sai hanesan benefisiariu koopera tebes ho kompaña nune’e sira rasik apoiu hodi desmantela (sobu) rasik uma sira afetadu ba projetu refere.

Ho entusiazmu ne’ebe komunidade iha mak Ministro do Desenvolvimento Rural e Habitação Comunitária Eng. Mariano ASSANAMI Sabino agradese ba Autoridade Komunitaria ho nia komunidade ne’ebe bele koopera malu ho parte relevante sira nune’e ohin loron bele inisia ona prosesu ne’e.

Atu relembra fali katak, Kompaña Delong, Unipesoal. Lda mak sei konstrui Uma Dignu Lot-1 iha Suku Aubeon, Postu Administrativu Barike, Munisipiu Manantu hamutuk uma 25 no Kompaña Rics Unip.Lda mak sei konstrui Uma Dignu Lot-3 iha Tunubibi Maliana uma hamutuk unidade 25.

Enkuantu Uma Dignu Lot 1 no Lot 3 kompaña sira hahu halo mobilizasaun material nune’e tempu besik hahu inisia prosesu konstrusaun.