𝐊𝐌 𝐃𝐞𝐥𝐢𝐛𝐞𝐫𝐚 𝐀𝐮𝐭𝐨𝐫𝐢𝐳𝐚 𝐀𝐬𝐢𝐧𝐚𝐭𝐮𝐫𝐚 𝐀𝐤𝐨𝐫𝐝𝐮 𝐌𝐨𝐛𝐢𝐥𝐢𝐝𝐚𝐝𝐞 𝐓𝐫𝐚𝐛𝐚𝐥𝐥𝐚𝐝𝐨́𝐫 𝐄𝐧𝐭𝐫𝐚𝐝𝐚 𝐁𝐚 𝐏𝐨𝐫𝐭𝐮𝐠𝐚𝐥 𝐁𝐮𝐤𝐚 𝐒𝐞𝐫𝐯𝐢𝐬𝐮

𝐃𝐢𝐥𝐢, 𝟎𝟐/𝟏𝟎/𝟐𝟎𝟐𝟑: Konsellu Ministru (KM) delibera ona hodi autoriza asinatura Akordu Administrativu ba aplikasaun Konvensaun entre Timor-Leste (TL), no Portugál kona-ba seguransa Sosiál no Memorandu Entendimentu entre Ministériu Traballu, Solidariedade Sosiál no Inkluzaun Portugál no Sekretaria Estadu Formasaun Profisionál no Empregu SEFOPE-TL kona-ba Mobilidade Traballadór Timor-oan nian.

Akordu sira nee sei asina husi Ministra MSSI, Sra. Verónica das Dores no Sekretáriu Estadu SEFOPE, Sr. Rogério Araújo Mendonça, respetivamente, durante vizita ofisiál ba Portugál.

Akordu dahuluk nee ho objetivu atu permite artikula no koloka iha vigór Konvensaun Seguransa Sosiál, neebé permite katak sidadaun Timor-oan no Portugés sira bele hetan benefísiu iha país rua nee, no ho benefísius Seguransa Sosiál neebé hanesan husi nasaun rua nee ida. Nunee, iha futuru Timor-oan sira bainhira sira husu reforma, hodi sura, sira bele halo kálkulu pensaun nian kona-ba deskontus neebé sira halo ona durante servisu iha Portugál.

Akordu daruak ho objetivu atu fasilita no organiza ho forma institusionál entrada Timor-oan sira ba Portugál hodi buka servisu. Ho akordu ida-nee, migrasaun Timor-oan sira ba Portugál bele trata ona ho dalan ofisiál no sei fasilita prosedimentu sira neebé presiza hodi hetan vistus servisu.

𝐌𝐞𝐝𝐢𝐚 𝐕𝐏𝐌-𝐌𝐂𝐀𝐒-𝐌𝐃𝐑𝐇𝐂