DILI, 14/04/2025: Gabinete Inspesaun no Auditoria (GIA), husi Ministerio Desenvolvimento Rural e Habitação Comunitaria (MDRHC), lidera no organiza enkontru regular trimestral hamutuk ho Inspetor Jeral Estadu no auditor sira husi entidade setor publiku administrativu sira, ne’ebe hala’o iha Auditoriu Ministeriu Finansas.
Reuniaun trimestral ne’e ho Tema “Perfil Inspetor no Auditor Sira Nian Sai Nu’udar Pesa Fundamental Ne’ebe Sei Kontribui Hodi Garante Kualidade Jestaun Di’ak Ba Funsionamentu Instituisaun Publiku Sira Nian”.
Iha reuniaun ne’e Ministru MDRHC, Eng. Mariano ASSANAMI Sabino, nu’udar mos Primeiru Ministru Interinu, hatete, hafoin konstrusaun estadu, tama ba konstrusaun nasaun, durante tinan 24 ukun aan estadu Timor-Leste konsege hatur ona instituisaun haat importante ne’ebe atu haforsa boa govenasaun mak hanesan, Inspetor Jeral Estadu (IJE), Komisaun Anti Korupsaun (KAK), Komisaun Funsaun Publiku (KFP) no Provedoria Direitu Humanus Justisa (PDHJ).
Husi instituisaun haat ne’e ida-idak sei hala’o ninia papel hodi haforsa instituisaun estadu sira ne’ebe hari’i ona hodi garantia boa governasaun iha instituisaun publiku administrativu sira hodi hala’o funsaun ba serviu publiku.
Alende ne’e, Ministru MDRHC husu inspetor no auditor interna sira atu ezerse funsaun ho lolos hodi observa lei regulamentu, politika planu no prosedimentu sira ne’ebe vigor ona. Alende ne’e, husu atu mantein padraun no integridade iha desizaun hotu-hotu ne’ebe halo hodi hametin konfiansa.
Alende ne’e, inspetor no auditor interna sira tenke respeitu obrigasaun sira segredu no konfindensialidade nian, labele fo sai informasaun interna no privelejiada. Alende ne’e ba auditor sira atu labele halo interferferensia ba halo analiza ka formulasaun ruma ba julgamentu.
Entretantu, Ministru MDRHC, husu ba inspetor no auditor sira atu tenke aprende barak liutan, tuir evelusaun mundu agora, atu hotu-hotu iha koñesementu ne’ebe klean hodi servisu ho profesional tuir de’it padraun no lei ne’ebe vigota ona.
