tes
MoU ne’e buka atu fasilita inisiativa konjunta no habelar oportunidade ekonómika iha Timor-Leste nia área rurál sira.
KUALA LUMPUR: 28/10/2025, Malázia no Timor-Leste ohin asina nota entendimentu (MoU) hodi hametin kooperasaun iha dezenvolvimentu rurál, foka ba área sira hanesan infraestrutura rurál, kapasitasaun, dijitalizasaun no transferénsia koñesimentu.
Akordu ne’ebé asina hosi Vise-Primeiru-Ministru Ahmad Zahid Hamidi no Ministru Negósiu Estranjeiru Timor-Leste Bendito dos Santos Freitas iha otél ida iha ne’e buka atu fasilita inisiativa konjunta no habelar oportunidade ekonómika iha área rurál Timor-Leste nian.
Zahid, ne’ebé nu’udar mós Ministru Dezenvolvimentu Rurál no Rejionál, hatete katak Malázia sei fahe nia esperiénsia iha empreendedorizmu dijitál, no edukasaun no formasaun téknika no vokasionál hodi ajuda Timor-Leste harii ekonomia rurál ne’ebé forte no inkluzivu liu.
“Ami lori tinan neen nulu atu to’o iha fatin ne’ebé ohin loron iha dezenvolvimentu rurál. Ha’u hein katak Timor-Leste bele hetan progresu hanesan iha tinan tolu nulu nia laran,” dehan Zahid.
Nia hatutan, Malázia haruka ona delegasaun ida mai Timor-Leste hodi identifika área potensiál sira kolaborasaun nian hodi hadi’a infraestrutura rurál.
Zahid mós hatete katak kompromisu Malázia nian habelar liu asisténsia téknika, hodi nota katak diskusaun sira hala’o daudaun ona entre investidór Malázia sira no sira nia omólogu sira Timor-Leste nian.
“Ami envolve hela ho setor privadu oioin, maibé iha nafatin limitasaun ba sira bainhira ko’alia kona-ba investimentu diretu estranjeiru no insentivu sira,” nia hatete.
Freitas deskreve akordu ne’e hanesan testamentu ba kooperasaun loloos no relasaun bilaterál sai realidade, hodi hatutan katak Timor-Leste iha esperansa atu hetan benefísiu hosi koñesimentu no esperiénsia Malázia nian iha dezenvolvimentu rurál.
“Ho MoU sira ne’e, ita bele hakbesik ita nia nasaun rua ne’e ba dezenvolvimentu rural. Ita hein esperiensia Malazia nian bele ajuda lori bem komum ba povu Timor-Leste,” nia hateten.
MoU ne’e tuir akordu rua seluk ne’ebé asina iha sábadu liubá hodi aumenta kooperasaun iha setór telekomunikasaun no mídia nian.
Hafoin Timor-Leste ofisialmente sai membru ba dala 11 hosi ASEAN, ho primeiru-ministru Timor-Leste, Kay Rala Xanana Gusmão, asina deklarasaun adezaun nian iha Simeira ASEAN nian ba dala 47 iha Kuala Lumpur.