tes
Aileu, 03 Dezembru 2025 – Ministériu Dezenvolvimentu Rurál no Habitasaun Komunitaria (MDRHC), liuhosi nia Centro Desenvolvimentu Aldeia (CDA), ofisialmente servisu hamutuk ho Kompañia Funan Santalum Unipessoal Lda. hodi hahú programa fornese fini Manu Broiler ba grupu benefisiáriu sira iha Munisípiu Aileu.
Enkontru ne’e realiza iha Sede Aldeia Mane Halo, Suku Madabenu, Postu Laulara, Munisípiu Aileu, Kuarta-feira, 03/12/2025.
Diretór Nasionál Inovasaun, Promosaun no Kapasitasaun (DNIPC) MDRHC nian, Manuel Maria dos Santos, hateten katak inisiativa ne’e nu’udar esforsu atu garantia sustentabilidade ekonómia rurál, hodi transforma haki’ak-na’in ki’ik sira sai empreendedór profisionál.
“Ami-nia vizaun mak atu garante katak produtór sira la’ós de’it prodús, maibé hetan fatin garantidu atu fa’an. Kooperasaun ho Funan Santalum ne’e garante katak sira iha ligasaun ba merkadu no bele hetan rendimentu regulár.”
MDRHC nia papél hanesan fasilitadór no mediadór atu asegura katak kontratu komersiál entre kompañia no grupu benefisiáriu ne’e justu, transparente, no fó benefísiu ba parte rua.
Diretór DNIPC mós salienta katak apoiu ba produsaun Broiler lokál iha Aileu kontribui ba vizaun boot Timor-Leste nian atu redús dependénsia ba importasaun manu ayam potong. Bainhira produsaun la’o di’ak no regulár, ne’e sei kria postu servisu no osan sirkula iha Munisípiu laran, fó kontribuisaun direta ba dezenvolvimentu rurál.
Hafoin remata enkontru, Kompañia Funan Santalum Unipessoal Lda. no Grupu Benefisiáriu sira asina kedas kontratu ofisiál atu efetiva fornese fini Manu Broiler ba grupu sira.
Media MDRHC