𝐌𝐢𝐧𝐢𝐬𝐭𝐫𝐮 𝐌𝐃𝐑𝐇𝐂 𝐀𝐛𝐞𝐫𝐭𝐮𝐫𝐚 𝐅𝐨𝐫𝐦𝐚𝐬𝐚𝐮𝐧 𝐒𝐚𝐞𝐦𝐚𝐮𝐥 𝐔𝐧𝐝𝐨𝐧𝐠 𝐍𝐞’𝐞𝐛𝐞 𝐅𝐨𝐤𝐮 𝐁𝐚 𝐀𝐫𝐞𝐚 𝐀𝐠𝐫𝐢𝐤𝐮𝐥𝐭𝐮𝐫𝐚

Dili, 05/11/2024: Ministro do Desenvimento Rural e Habitação Comunitária (MDRHC), Eng. Mariano ASSANAMI Sabino, abertura formasaun Saemaul Undong (SMU), ne’ebe foku liuba iha area agrikultura, iha Salaun João Paulo II, Rai-Kotu.

Koordenador SMU Timor-Leste, hatete, SMU nu’udar movimentu ida ne’ebe ejiste iha aldeia no suku, ne’ebe ho objetivu atu dezenvolve ekonomia populasaun sira iha aldeia ne’ebe la ho osan, maibe oinsa atu muda ema nia mentalidade.

SMU movimentu ida ne’ebe mai la’os atu ko’alia de’it, maibe mai atu servisu, ho prinsipiu ida katak fo fini ida oinsa bele habarak fini ne’e sai hanesan baze ida atu hamoris ekonomia iha aldeia maibe ne’e depende ba vontade populasaun sira nian.

Movimentu ne’e hatudu ona provas halo Korea ohin loron sai nasaun avansadu maske sira la iha rekursu naturais ne’ebe adekuadu, maibe ho movimentu ida ne’e Korea ohin sai ona nasaun ne’ebe avansadu.

Enkuantu Diretor Formasaun SMU Korea Mr. Lee Song Gyu, lori Prezidente SMU Korea nia naran agradese ba Governu Timor-Leste no partisipante sira hotu ne’ebe iha vontade hodi tuir formasaun ida ne’e.

Sentru SMU nia proverbiu mak hanesan, Ulun Rua diak liu sai ulun ida de’it hamutuk luta ba aan rasik hodi hamoris ekonomia iha aldeia ne’ebe hela ba.

Formasaun loron tolu ne’e formandu sira sei aprende prinsipiu no valores SMU nian atu bele ajuda imi hotu hodi dezenvolve ida-idak nia aldeia, no imi hotu mos tenke partilla esperiensia bam alu husi ida-idak nia aldeia saida mak akontese iha ne’eba, atu nune’e sai hanesan bukae ida hodi dezenvolve ekonomia iha ida-idak nia adeia.

Iha fatin hanesan Ministru MDRHC, hatete, formasaun loron tolu ne’e importante tebes ba formandu sira atu aproveita tempu ne’e aprende ho di’ak bainhira ida-idak fila ba aldeia bele fahe fila fali ba sira seluk nune’e implementa.

Programa Movimentu SMU nian ohin loron ejiste ona iha aldeia barak tanba ne’e formasaun konjunta entre movimentu no Ministeriu Dezenvolvimentu Rural nia ema atu reforsa malu iha aldeia hodi realiza programa ne’ebe bele fo benefisiu ba populasaun sira iha ne’eba.

Implementasaun programa dezenvolvimentu rural ne’e la fasil maibe ho prejensa SMU nian hamutuk ho funsionariu sira ne’ebe rekrutadu ona hodi destaka iha aldeia sira presiza servisu makas, kontinua enkoraza no muda pensamentu komunidade sira nian sai ema ne’ebe lutador iha aldeia.

Vise-Primeiru Ministru kontinua enkoraza funsionariu destakadu Dezenvolvimentu Rural nian atu nafatin kaer metin prinsipiu ukun rasik aan nian hodi kuda metin patriotizmu no nasionalizmu iha ida-idak nia pensamentu hodi kontribui dezenvolvimentu hahu husi aldeia.

Iha fatin hanesan, Diretor Jeral Dezenvolvimentu Rural, Filipe Cardoso Vieira, hatete, formandu sira ne’ebe frekuenta formasaun refere hamutuk nain 70.

Husi numeru ne’e ema nain 40 husi Ministeriu Dezenvolvimentu Rural ne’ebe mai husi munisipiu 8 no nain 30 seluk nudar benefisiariu programa SMU ne’ebe mai husi Aileu no Atauro.

“Tuir loloos formasaun ne’e ba halo iha Korea ho ema nain 5, maibe ita kontaktu ho Sentru Saemaul Undong sira posivel fo formasaun iha Timor ita bele envolve ema barak liutan,” dehan nia

Filipe Vieira husu ba formandu sira atu aproveita didiak tempu hirak ne’e atu nune’e fila ba ida-idak nia fatin karik bele servisu hamutuk nune’e bele implementa planu ne’ebe sai tarjetu iha aldeia sira.