𝐆𝐨𝐯𝐞𝐫𝐧𝐮 𝐊𝐨𝐧𝐭𝐢𝐧𝐮𝐚 𝐁𝐮𝐤𝐚 𝐃𝐚𝐥𝐚𝐧 𝐀𝐩𝐨𝐢𝐮 𝐉𝐨𝐯𝐞𝐧 𝐊𝐫𝐞𝐚𝐭𝐢𝐯𝐮

𝐃𝐢𝐥𝐢,𝟐𝟐/𝟎𝟗/𝟐𝟎𝟐𝟑: Primeiru-Ministru em exersisiu Eng. Mariano ASSANAMI Sabino, motiva joven sira liu husi dalan polítika hodi fó garantia atu atinje sira nia mehi boot hakarak sai emprezariu neebé kreativu no inovativu hodi investe iha setór produtivu.

Iha Serimónia Entrega Prémiu Kompetisaun Negosiu Inovativu ba Dala IV-MCI 2023. ho dalan “Promove Empreendedorizmu Liu Husi Asesu ba Kapital no Formasaun Negosiu”.

Joven empreendedorizmu neebé tuir kompetisaun nee mai husi rejiaun tolu mak hanesan, Rejiaun Leste, Rejiaun Sentral no Oeste.

Iha serimónia entrega premiu ba manan nain sira, Primeiru-Ministru Interinu, apresia ho atividade nee no husu atu iha kontinuidade hodi promove joven kreativu sira neebé mak iha komitmentu hadia ekonomia familiar hodi tulun dezenvolve ekomonia nasionál liu husi dalan empreendedorizmu.

Ba joven sira neebé hakarak sai emprejariu presiza esforsu aan, disiplina, dedikasaun, tanba sai emprejariu nee dalaruma hasoru situasaun monu-hader, maibé kuandu monu ona labele pesimista, maibé tenke foti sai lisaun para hadia aan nudar pontu aranka ba dalan susesu nian.

“ba joven sira neebé iha mehi atu sai emprejariu iha neeba imi sei hasoru situasaun neebé defisil, dala ruma ita monu, depois hader fali, dala ruma ita monu lakon ona esperansa hodi lakohi kontinua, maibé imi tenke foti ida nee sai referensia hodi estuda husi imi nia frakasu (Kegagalan) ida nee para hader fila fali,” dehan, Primeiru-Ministru Interninu, iha Hotel Timor.

Agradese ba governu anterior sira neebé hatur ona politika ida nee, iha IX Governu Konstitusionál sei kontinua buka dalan oi-oin hodi fasilita nafatin joven kreativu sira atu asesu ba banku hodi halo kreditu.

Ba governador Banku Sentral (BCTL), presiza halo esforsu neebé makas servisu ho banku sira neebé ejiste ona atu bele fasilita joven sira asesu ba kreditu ho kriteria sira neebé fasil.

Dadaun nee, númeru asesu ba kreditu sei menus tebes, tanba kriteria neebé garantia ba banku hodi hetan kreditu liu-liu hanesan titulu ba rai neebé seidauk klaru, maibé governu sei haree.

Neebé ba governadór BCTL atu haree oinsá simplifika kriteria ba garantia atu asesu ba kreditu, tanba joven barak neebé remata nia estudu iha univesidade sira seidauk iha rai no uma, maibé sira iha vontade atu halo negosiu nee presiza haree.

Serimónia entrega preminu nee, partisipa husi, Ministru Komersiu Industria, MAPPF, ajensia internasionál sira, no grupu joven kreativu neebé mai husi rejiaun tolu.

𝐌𝐞𝐝𝐢𝐚 𝐕𝐏𝐌-𝐌𝐂𝐀𝐒-𝐌𝐃𝐑𝐇𝐂