tes
Dili: 04/08-2026 – Tersa Feira Semana ne’e Ekipa Téknika husi Gabinete Vise-Primeiru-Ministru, Ministru Koordenador Assuntu Sosiáis no Ministru Dezenvolvimentu Rural Abitasaun Komunitaria (VPM2-MCAS-MDRHC), reprezenta husi Diretor-Jeral Dezenvolvimentu Rural, Sr. Filipe Cardoso Vieira ho ekipa aprezenta Konseitu Programa Eskola Rural Matak & Kreativu (ESRUMAK) hamutuk ho Manual Prátika “Laboratóriu Matak”, ba Ministériu Edukasaun hodi Entra iha Prosesu Aprendizajen Kurrikulár no Extrakurrikulár.
Inisiativa estratéjika ne’e ho objetivu atu hametin kualidade aprendizajen kontekstualizadu iha área rurais Timor-Leste nian. Iha enkontru ne’e, Diretor-Jeral Dezenvolvimentu Rural, Sr. Filipe Cardoso Vieira hato’o pontu no objetivu matadalan husi programa ESRUMAK no Manual “Laboratóriu Matak” hodi hatudu oinsá espásu meiu-ambiente rural no rekursu naturáis bele transforma sai meiu edukativu ne’ebé vivu, inovativu, no prátiku ba estudante sira-liuliu ba siénsa no protesaun meiu-ambiente. DG Filipe mos akresenta katak, ESRUMAK sei sai atividade prioridade ida iha Ministériu Dezenvolvimentu Rural nian, ne’ebé sei ajusta no integra iha Programa Revitalizasaun Komunitária.
Entertantu Sua Exelénsia Ministra Edukasaun Dulce de Jesus Soares ho ekipa téknika simu no apresia ba inisiativa no manual rua ne’e, Exelénsia Ministra Edukasaun salienta katak, matadalan no prátika ne’ebé aprezenta iha manual sira-ne’e aliña tebes ho viziaun Ministériu nian hodi moderniza no hafórsa kuríkulu edukasaun nian, hodi fó émfaze ba aprendizajen prátika (hands-on learning).
Hatan ba aprezentasaun ne’e, Sua Exelénsia Ministra Edukasaun Dulce de Jesus Soares foti kedas desizaun estratéjika rua:
- Integrasaun no Ajustamentu ESRUMAK iha prosesu aprendizajen tantu kurrikulár no mós extrakurrikulár
- Kria Ekipa Servisu no Eskola Pilotu: Kria Ekipa Servisu (Kombinadu/Konjunta) hodi identifika no hili eskola balun iha área rurais ne’ebé sei sai Eskola Pilotu ba fase dahuluk implementasaun programa ESRUMAK no Laboratóriu Matak.
Inisiativa inter-institusionál ne’e sai hanesan pontu entrada ida iha transformasaun edukasaun no dezenvolvimentu rural iha Timor-Leste, hodi kria jerasaun foun ne’ebé krese ho matenek siéntifiku, kreativu, no respeitu ba meiu-ambiente.