𝐏𝐌 𝐈𝐧𝐭𝐞𝐫𝐢𝐧𝐮 Partisipa Serimonia 𝐏𝐨𝐬𝐞 𝐁𝐚 𝐏𝐫𝐞𝐳𝐢𝐝𝐞𝐧𝐭𝐞 𝐀𝐮𝐭𝐨́𝐫𝐢𝐝𝐚𝐝𝐞 𝐏𝐞𝐭𝐫𝐨́𝐥𝐞𝐨 𝐧𝐨 𝐌𝐢𝐧𝐞𝐫𝐚𝐢𝐬

𝐃𝐢𝐥𝐢, 𝟐𝟐/𝟎𝟗/𝟐𝟎𝟐𝟑: Primeiru-Ministru em exersisiu Eng. Mariano ASSANAMI Sabino, partisipa serimonia pose ba autoridade masimu ba rekursu naturais nain lima neebé antes nee Konsellu Ministru aprova ona, iha loron 13 fulan-Setembru 2023, liu ba.

Sr. Rui Maria Alves Soares, ba kargu Prezidente Konsellu Administrasaun TIMOR GAP, E.P. ba mandatu ida ho tinan haat.

Sr. José Manuel Gonçalves, ba kargu Prezidente Konsellu Administrasaun no ho inerénsia, Prezidente Komisaun Ezekutiva Murak Rai Timor, E.P., ba mandatu ida ho tinan haat.

Sr. Gualdino do Carmo da Silva, ba kargu Prezidente Konsellu Diretivu Autoridade Nasionál Petróleu, I.P. (ANP), ba mandatu foun ida ho durasaun tinan haat.

Sr. Rafael Danilson Magno de Araújo, ba kargu Prezidente Konsellu Diretivu Autoridade Nasionál Minerais, I.P. (ANM), ba mandatu ida tinan haat.

Sr. Job Brites dos Santos, ba kargu Prezidente Konsellu Diretivu Institutu Jeosiénsias Timor-Leste, I. P. (IGTL — sigla iha lian portugés), ba mandatu ida ho tinan haat.

Iha serimonia pose, Primeiru Ministru Interinu, hatete, tuir loloos Primeiru-Ministru mak mai fó pose hodi fó lia menon direita atu emposadu sira bele iha korajen hodi resposabiliza servisu neebé tula ona ba kabas.

Rekursu naturais nee rekursu importante neebé sosa ho ruin no ran, neebé ohin loronsa sai esperansa ba povu nian, tanba nee presiza iha responsabilidade oinsá dezenvolve rekursu sira tasi laran no rai maran, husi petroleo, minerais ho mineiru.

Povu neebé vota hakarak ba mundansa ho esperansa boot ba esplorasaun greater sunrise no ba sira seluk neebé lao daudauk liu-liu iha rai maran.

“Reprezentante veteranus iha nee atu fó nafatin esperansa ba imi nain lima mak atu luta kontinua buka dalan dezenvolve ita nia rikusoin iha rai-maran no mós iha tasi laran, hodi loke kampu servisu ba joven sira no dudu ita nia ekonomia ba oin,” dehan PM Interinu, iha Delta Nova.

Ba mudansa kargu prosesu normal ida, tanba nee ba prezidente sesante sira presiza koopera malu, servisu hamutuk hodi realiza povu nia esperansa ba moris diak nian.

Politikamente no teknikamente tenke koopera, teke lao ho ekipa para susesu nee bele iha, tanba ministeriu nee espesial ho servisu neebé rapidu, nivel implementasaun programa iha leten liu kompara ho ministériu hotu-hotu, tanba estadu haruka ema lubuk ida ba eskola ba dunik ida nee, entaun area nee mak sei luta ba ekonómia ekipa nee mak sei komanda ba oin.

Emposadu sira tenke hanoin katak, aswain sira lakon sira nia familia, lakon buat hotu-hotu luta ba rai nee nia independensia, sira dehan deit Timor tenki livre no moris diak, sé mak atu lori moris diak nee mak mate restu sira neebé sei moris.

Entaun ba mate restu sira tenke hamrik fila fali iha aswain sira nia fatin luta ba Timor para dignifika rai no povu, atu joven sira labele halerik bebeik ba servisu iha rai liur, maibé sira tenki servisu ona iha rai laran.

𝐌𝐞𝐝𝐢𝐚 𝐕𝐏𝐌-𝐌𝐂𝐀𝐒-𝐌𝐃𝐑𝐇𝐂