𝐊𝐑𝐎 𝐄𝐧𝐭𝐫𝐞𝐠𝐚 𝐓𝐞𝐭𝐮 𝐎𝐫𝐬𝐚𝐦𝐞𝐧𝐭𝐮 𝟐𝟎𝟐𝟔 𝐁𝐚 𝐌𝐃𝐑𝐇𝐂

DILI,21/08/2025: Komité Revizaun Orsamentu (KRO) entrega ona Tetu Orsamentu 2026 bá Vise-Primeiru Ministru, Ministro Koordenador bá Assuntu Sosiais, Ministériu Dezenvolvimentu Rurál no Habitasaun Komunitária (V-PM-MCAS-MDRHC) liu husi reuniaun ne’ebé hala’o iha Auditóriu Ministériu Finansas (MF) Aitarak-Laran.

Tetu Orsamentu ba Ministério MDRHC hamutuk $8,056,673, fahe bá Saláriu no Vensimentu $1,703,948, Bens no Servisu Korrentes $1,352,725 ho Transferênsia Públikas $5,000,000.

Vise-Primeiru-Ministru, MKAS-MDRHC, Eng. Mariano ASSANAMI Sabino konsidera Tetu Orsamentu ne’ebé simu bá Ministériu MDRHC ne’e ki’ik-liu, tanba ne’e maka aprezenta orsamentu adisionál ho montante millaun $70-resin bá programa prioridade Abitasaun Komunitária hamutuk 1.300 bá 13 munsípiu iha tinan 2026.

“𝐊𝐨𝐧𝐚-𝐛𝐚́ 𝐓𝐞𝐭𝐮 𝐎𝐫𝐬𝐚𝐦𝐞𝐧𝐭𝐮 𝐧𝐞’𝐞𝐛𝐞́ 𝐬𝐢𝐦𝐮 𝐨𝐧𝐚 𝐬𝐞𝐢𝐝𝐚𝐮𝐤 𝐟𝐢𝐱𝐮 𝐭𝐚𝐧𝐛𝐚 𝐊𝐑𝐎 𝐬𝐞𝐢 𝐓𝐞𝐭𝐮 𝐧𝐨 𝐡𝐚𝐥𝐨 𝐟𝐚𝐥𝐢 𝐚𝐯𝐚𝐥𝐢𝐚𝐬𝐚𝐮𝐧 𝐛𝐚́ 𝐎𝐫𝐬𝐚𝐦𝐞𝐧𝐭𝐮 𝐀𝐝𝐢𝐬𝐢𝐨𝐧𝐚́𝐥 𝐧𝐞’𝐞𝐛𝐞́ 𝐩𝐚𝐫𝐭𝐞 𝐌𝐢𝐧𝐢𝐬𝐭𝐞́𝐫𝐢𝐮 𝐚𝐩𝐫𝐞𝐳𝐞𝐧𝐭𝐚, 𝐧𝐮𝐧𝐞’𝐞 𝐛𝐞𝐥𝐞 𝐝𝐞𝐬𝐢𝐝𝐞 𝐡𝐢𝐤𝐚𝐬 𝐭𝐮𝐢𝐫 𝐩𝐫𝐨𝐠𝐫𝐚𝐦𝐚 𝐩𝐫𝐢𝐨𝐫𝐢𝐝𝐚𝐝𝐞 𝐬𝐢𝐫𝐚 𝐢𝐡𝐚 𝐭𝐢𝐧𝐚𝐧 𝟐𝟎𝟐𝟔,” Mariano ASSANAMI Sabino hateten.

Enkuantu, Ministério Dezenvolvimento Rúral e Habitação Comunitária hanesan Ministériu foun ne’ebé estabelese iha IX Governu Konstitusionál haktuir Dekretu Leí Organika Nú 67/2023 14 Setembru, iha papel importante atu koordena no ezekuta politíka MDRHC hadi’a povu nia moris.

Reuniaun KRO prezide hosi Primeiru-Ministru (PM), Kay Rala Xanana Gusmão ho prezensa hosi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, Ministra Finansas, Santina José Rodrigues Viegas Cardoso, Ministru Obras Públikas, Samuel Marçal, Ministru Planeamentu no Investimentu Estratéjiku, Gastão Francisco de Sousa no Vise- Ministra Finansas, Felícia Claudinanda Cruz Carvalho.