Vise-Primeiru Ministru Ne’ebé Akompaña Husi Ministra Edukasaun Enkontru ho Unicef Ko’alia Assuntu Dezenvolvimentu Primaria Infansia
Dili, 17/08/2023: Vice-Primeiro Ministro, Ministro Coordenadór dos Assuntos Sociais e Ministro Desenvolvimento Rural e Habitação Comunitária Eng. Mariano Assanami Sabino, ne’ebé akompaña husi S.E. Ministra Edukasaun, enkontru ho Unicef, hodi diskute assuntu dezenvolvimentu primaria da infansia.
Enkontru treepartida ne’e, diskute asuntu dezenvolvimentu primária da infânsia, programa ne’e tutela ba Vise-Primeiru Ministru, ne’ebé sei servisu hamutuk ho steering committee ida ne’ebé kompostu husi ministériu hotu iha área sosiais nian.
Ohin ne’e enkontru dahuluk, ba oin oinsá estabelese steering committee ida atu nune’e hotu-hotu bele servisu hodi haree ba assuntu dezenvolvimentu labarik nian hahú husi idade tinan 0 to’o 7.
Iha ne’ebé ema hotu hatene katak, iha Timor krekas no badak sai problema boot, nune’e mós teoritikamente hateten, bainhira labarik nia dezenvolvimentu sedu la’o ladiak, ninia dezenvolvimentu kontinua iha edukasaun ka area hotu sei afeta tebes, tanba nia la iha fundasaun ida mak di’ak.
Alende ne’e, sé nasaun investe di’ak ba iha idade ida ne’e, sei hetan retornu ida ne’ebé boot. Se estadu investe $1 ba labarik ida, iha idade 0 to’o 7, nia retornu ne’e sei sai $7 iha nia moris, nomós sei halo nasaun sai forte tanba iha sidadaun sira matenek, saudavel no produtivu iha futuru.
Tanba ne’e, ba oin atu kombate má-nutrisaun presiza ministériu hotu-hotu ne’ebé trata assuntu sosiais tenke servisu hamutuk no halo koordenasaun ne’ebé efetivu nune’e bele atinje programa ida ne’e nia foku.
Media V-PM-MCAS-MDRHC
