Dili, 08/08: Vice-Primeiro Ministro, Ministro Coordenador dos Assuntos Social e Ministro de Desenvolvimento Rural e Habitação Comunitária, Eng. Mariano Assanami Sabino, simu vizita kortejia husi Embaixadór Malázia iha Timor-Leste Mr. Amarijit Sarijit Sing, iha Palasiu Governu.
Vise-Primeiru Ministru, Mariano Assanami Sabino informa, objetivu enkontru ho Embaixadór Malázia mai fahe esperiensia kona-ba modelu dezenvolvimentu rural ne’ebé implementa iha sira nia rain.
“Sira mai fahe esperiensia ne’ebé mak sira iha mai ita, agora ita nian sá modelu dezenvolvimentu rural mak ita sei implementa, entaun ita presiza rona sira hotu-hotu,” dehan Vise Primeiru-Ministru.
Depois de tinan 20 ukun aan kada periodu tinan lima-lima governu tun no ida seluk sa’e fali, tanba ne’e apresia ba IX governu ne’ebé hari Ministériu Dezenvolvimentu Rural no Habitasaun Komunitaria atu bele foku servisu iha área rural ne’eba.
Politika IX Governu tau povu nu’udar sentru ba dezenvolvimentu, entaun ema hotu tenke halo buat importante ba ema iha rurais. Tanba ne’e presiza koordena ho ministériu seluk ne’ebé halo atividade iha ne’eba,
Iha fatin hanesan Embaixadór Malázia, Amarijit Sarijit Sing hatete, ohin mai hasoru malu ho Vise Primeiru-Ministru hodi hato’o modelu Dezenvolvimentu Rural iha Malázia, oinsá Timor-Leste mós bale halo ninia Dezenvolvimentu Rural tuir esperiénsia ne’ebé iha.
“Ha’u mai fahe esperiénsia ba Vise Primeiru-Ministru hanesan Ministru Dezenvolvimentu Rural ne’e referensia ida atu bele haree iha futuru, tanba maioria povu Timor-Leste moris iha rurais,” dehan nia.
Problema sosiál ne’e iha liu area rural sira duke kapitál, entaun Timor-Leste iha ona nia ministériu ida ne’ebé haree ba rural ne’e di’ak tebes, hodi bele haree liu ba dezenvolvimentu iha baze.
