𝐏𝐫𝐢𝐦𝐞𝐢𝐫𝐮-𝐌𝐢𝐧𝐢𝐬𝐭𝐫𝐮 𝐈𝐧𝐭𝐞𝐫𝐢𝐧𝐮 𝐃𝐞𝐬𝐩𝐞𝐝𝐞 𝐓𝐫𝐚𝐛𝐚𝐥𝐥𝐚𝐝𝐨́𝐫 𝐓𝐢𝐦𝐨𝐫 𝐎𝐚𝐧 𝐇𝐮𝐬𝐮 𝐒𝐞𝐫𝐯𝐢𝐬𝐮 𝐡𝐨 𝐃𝐢𝐬𝐢𝐩𝐥𝐢𝐧𝐚 𝐧𝐨 𝐑𝐞𝐬𝐩𝐨𝐧𝐬𝐚𝐛𝐢𝐥𝐢𝐝𝐚𝐝𝐞

𝐃𝐢𝐥𝐢,𝟐𝟐/𝟎𝟗/𝟐𝟎𝟐𝟑: Primeiru-Ministru em exersisiu Eng. Mariano ASSANAMI Sabino, despede traballador Timor oan hamutuk nain 182, husi numeru nee feto hamutuk nain 57 neebé ba servisu iha Austrália.

Iha serimonia despedida nee, Primeiru-Ministru em exersisiu, husu ba traballadór sira hotu atu servisu kuidadu aan, hatudu nafatin disiplina no responsabolidade tomak durante iha ema nia rain.

“Imi neebé mak ba servisu iha Australia laos ba servisu deit hodi hetan osan, maibé imi ba para aprende too tempu imi fila mai serví fali imi nia rai,” dehan, Xefe Governu Interinu, iha Komoro, Hotel Timor Logde.

Primeiru Ministru, Maun Boot, Kay Rala Xanana Gusmão , hotoo nia hakuak boot ho domin tomak ba hotu-hotu. Maun Boot hanoin katak, lakohi para imi ba dook halo servisu.

Tanba nee, iha Nonu Governu Konstitusionál, trasa hela politika programa oinsá atu loke kampu servisu iha rai laran nunee bele emprega joven sira atu servisu iha nia rain rasik.

Ba oin kuandu kampu servisu rai laran barak ona mós servisu iha rai liur nee nafatin prioridade no importante atu nunee joven sira bele ba aprende, haree ema nia rai, oinsá ema moris, oinsá ema lao, ema esforsu. Servisu boot ka kiik, saida deit maka halo iha liur nee imi aswain, tanba husi imi nia servisu, bele hatama reseita mai rai-laran.

“Imi neebé ba rai-liur, imi tenki fiar imi nia aan katak servisu neebé imi halo nee kontribuisaun boot ba familia neebé hela iha nee nomós ba ita nia rai,” dehan PM Interinu.

Husu ba traballadór hotu-hotu esforsu para disiplina tempu neebé ema fó, iha neeba dader tenke hader ona para prepara servisu too fali kalan, kalan fila mai toba dader ba fali, tanba nee tenke uza tempu ho masimu, aprende kultura servisu foun, kultura servisu respeitu oras.

“Hau nia hakuak boot ba imi hotu, ba tenke hanoin nafatin Timor, imi ba ho Maromak, ba ho ita nia bei-ala sira nia tulun, imi hotu-hotu sei isin diak, fiar metin katak imi ida liman kukun mós sei lamonu too fila fali mai Timor.”

𝐌𝐞𝐝𝐢𝐚 𝐕𝐏𝐌-𝐌𝐂𝐀𝐒-𝐌𝐃𝐑𝐇𝐂