Departamentu ba Administrasaun no Pagamentu mak serbisu husi DNA ne’ebé responsável ba administrasaun no pagamentu husi kontratu públiku sira MDRHC nian.
Departamentu ba Administrasaun no Pagamentu nia kompeténsia inklui:
- Elabora no disponibiliza informasaun no indikadór estatístiku kona-ba atividade sira husi aprovisionamentu no asegura rejistu kompletu no aktualizadu husi prosesu sira aprovisionamentu hotu iha MDRHC;
- Emite pareser ka opiniaun wainhira hetan solisitadu kona-ba prosedimentu aprovisionamentu atu utiliza ba akizisaun bens ka servisu sira ka atu hala’o obra sira MDRHC nian;
- Dezenvolve, implementa no disemina orientasaun no prosedimentu operasionál padronizadu ba prosesu sira aprovisionamentu no rekursu sira iha área aprovisionamentu;
- Koordena no armoniza implementasaun aprovisionamentu tuir orientasaun superiór Ministru nian ka entidade públika seluk ne’ebé legalmente kompetente, hodi jere no mantein atualizasaun baze dadus fornesedor sira MDRHC nian;
- Elabora proposta ba kuadru pessoál Departamentu nian, asegura identifikasaun funsaun espesífiku husi funsionáriu sira iha Departamentu nia laran, hodi kumpri no respeitu ba planu orsamentál internu;
- Elabora dokumentus ne’ebé presiza iha ámbitu administrasaun públika atu asegura funsionamentu regular no efetivu husi Departamentu;
- Realiza tarefa sira seluk ne’ebé atribuídu liu husi lei, regulamentu ka determinasaun superiór.
Departamentu ba Administrasaun no Pagamentu lidera husi Xefe Departamentu ida, ne’ebé nomeadu tuir termus rejime legal ba kargu diresaun no xefia Administrasaun Públika nian.
*RESOURCE: Diploma Ministerial N.º 18 /2024 de 28 de Fevereiro Artigu 24.º Departamentu ba Administrasaun no Pagamentu