Dili, 20/07/2023: Embaixadór Koreia do Súl iha Timor-Leste, Jeon Ho, kongratula Vice-Primeiro Ministro e Ministro Coordenador dos Assuntos de Desenvolvimento Rural (V-PM-MCADR), Eng. Mariano Assanami, relasiona ho knar foun ne’ebé nia hetan, aumezmu tempu hato’o mós Koreia nia komitmentu ba assuntu Dezenvolvimentu Rural.
Embaixadór Koreia do Súl iha Timor-Leste, Jeon Ho, hatete, sorumutu ohin ne’e lori Governu Koreia do Súl nia naran hakarak mai felisita Vise-Primeiru Ministru ne’ebé hetan nomeasaun foin lalais ne’e.
Koreia ho Timor-Leste nia servisu kooperasaun diak tebes hahú kedas 1999 mai to’o ohin loron, fiar katak ba oin sei fortifika liu tan atu nune’e lori rezultadu di’ak ba povu.
“Reprezenta Governu Koreia mai fó parabens ba nia, idepois ami ko’alia kona-ba projetu ne’ebé hanaran Semaul Undong ne’ebé mak ami komprende agora dadaun iha Ministru Koordenador Assuntu Dezenvolvimentu Rural ninia okos,” dehan nia, iha Palásiu Governu.
Nia dehan, Koreia ohin loron sai nasaun dezenvolvidu nia fatór determinante ida mak mai husi Projetu Saemaul Undong, projetu ida ne’ebé mak foku ba Dezenvolvimentu Rural, sira investe no sira hanorin komunidade sira oinsá serbisu husi okos mai leten.
Husi esperensia ne’ebé Koreia iha hakarak partilia ho Timor-Leste liu-liu ho Ministru Koordenador Assuntu Dezenvolvimentu Rural oinsá replika fila-fali, tanba povu Timor maioria pursentu 70 iha área rural ne’eba, tanba ne’e investimentu iha área rural importante tebes para oinsá eleva sira nia moris husi kraik mai leten.
Alende ne’e, Governu Koreia mós komprometidu apoiu Timor liu husi Projetu KOIKA nian, no setór privadu sira iha Koreia mós hakarak apoiu Timor oinsá fó moris di’ak ba povu iha baze ne’eba.
“Ami iha diskusaun ne’ebé mak di’ak tebtebes, ha’u nia hanoin vise Primeiru Ministru nia hanoin kuaze hanesan de’it oinsá mak lori moris di’ak ba povu sira iha rural, ne’ebé ami kontente tebes,” deha nia
Vice-Primeiro Ministro e Ministro Coordenador dos Assuntos de Desenvolvimento Rural (V-PM-MCADR), Eng. Mariano Assanami, hatete, ohin ami diskute kona-ba asuntu dezenvolvimentu rural ho Koreia tanba sira antes ne’e apoiu ona Timor liu husi programa Saemaul Undong nomós liu husi Ajensia KOIKA ne’e nia prográma barak liga ba área rurais.
“Ita koordena hela, hein katak alvu prinsipál ida, oinsá hasa’e rendimentu perkapita oinsá ita hasa’e ekonómia iha rurais, no oinsá hamenus ki’ak iha rurais, nomós oinsá hakiak trabaladór iha area rurais,” nia informa
Ministeriu Koordenador ida ne’e iha responsabilidade boot liu atu oinsá segundu independensia husi kraik ne’e bele sente katak suku, aldeia liu-liu nu’udar nukleu prinsipál husi Estrutura Administrativu ne’e ki’ik liu maka iha Aldeia.
“Ema hotu-hotu moris iha aldeia ne’e maka ita oinsá maka konta aldeia ida ba Aldeia ida, suku ida ba suku ida ita tenke hases husi ki’ak no má-nutrisaun no hases husi kampu de serbisu ne’ebé ke laiha entaun ita tenke hakiak,” nia dehan.
Nasaun ida kuandu forte, aldeia ka suku tenke forte, maibé aldeia forte tanba uma kain sira forte, uma kain forte tanba pensamentu mudansa mentalidade nomós iha inovasaun no iha ona kreatividade iha uma kain sira nia laran liu husi rendimentu ne’ebé mak sei haforsa.
Tanba ne’e, hanesan responsavel ba dezenvolvimentu rural sei koordena ho doadores sira, liu husi embaixadór sira iha Timor oinsá fó apoiu ba povu iha area rural.
